ऊसाच्या पहिल्या उचलीसाठी स्वाभिमानी शेतकरी संघटनेचे महामार्गावर ठिय्या आंदोलन; ४ हजारांहून अधिक वाहने अडकली

सातारा : ऊसाला पहिली उचल ४ हजार २०० रुपये मिळावी, या मागणीसाठी स्वाभिमानी शेतकरी संघटनेने पश्चिम महाराष्ट्रात आंदोलन तीव्र केले आहे. पुणे-बंगळुरू राष्ट्रीय महामार्गावरील किणी टोलनाक्याजवळ गेल्या ४५ तासांहून अधिक काळापासून संघटनेचे ठिय्या आंदोलन सुरू आहे. सरकारने तातडीने तोडगा काढला नाही, तर आंदोलन आणखी तीव्र करण्याचा इशारा संघटनेचे अध्यक्ष राजू शेट्टी यांनी दिला आहे.

शेतकऱ्यांची दिवाळी महामार्गावर होणार असेल, तर सरकारला त्याचे परिणाम भोगावे लागतील, असा इशाराही राजू शेट्टी यांनी दिला. यापूर्वी त्यांनी मुंबईकडे भाजीपाला आणि दूध जाऊ देणार नसल्याचा इशारा दिला होता. ऊस दराचा प्रश्न तातडीने सोडवावा, अशी मागणी संघटनेकडून करण्यात येत आहे.

महामार्गावर वाहनांच्या लांबच लांब रांगा

पुणे-बंगळुरू महामार्गावरील आंदोलनामुळे मालवाहतुकीवर मोठा परिणाम झाला आहे. साताऱ्यापासून कागलच्या पुढे कर्नाटक सीमेपर्यंत वाहनांच्या लांबच लांब रांगा लागल्याचे वृत्त आहे. या महामार्गावर चार हजारांहून अधिक वाहने अडकून पडल्याचा दावा करण्यात आला आहे.

पुणे-बंगळुरू राष्ट्रीय महामार्ग हा देशातील महत्त्वाच्या मालवाहतूक मार्गांपैकी एक आहे. या मार्गावरून दररोज २५ हजारांहून अधिक मालवाहतूक वाहने प्रवास करतात. ऐन दिवाळीच्या काळात अवजड वाहनांची वाहतूक विस्कळीत झाल्याने व्यापारी आणि वाहतूकदारांसमोर अडचणी निर्माण झाल्या आहेत.

हेही वाचा –  महाराष्ट्रात गोदरेज समूहाची २५ कोटींची गुंतवणूक; आरोग्य, महिला सक्षमीकरण आणि कृषी विकासाला चालना

विवेकानंद पाटील यांची आंदोलनस्थळी भेट

MPSC आंदोलनाच्या माध्यमातून राज्यभर परिचित झालेले विवेकानंद पाटील यांनीही शेतकरी आंदोलनस्थळी भेट दिली. ऊस दराच्या प्रश्नावर तोडगा काढण्यासाठी सरकारने शेतकरी संघटना आणि साखर कारखानदारांशी चर्चा करावी, असे आवाहन त्यांनी केले. त्यांचे म्हणणे ऐकण्यासाठी हजारो शेतकरी रात्री उशिरापर्यंत आंदोलनस्थळी उपस्थित असल्याचे सांगण्यात आले.

दरम्यान, ऊस दराच्या प्रश्नावर तोडगा काढण्यासाठी शेतकरी आणि साखर कारखानदारांची तातडीने बैठक घ्यावी, अशी मागणी रक्षक प्रतिष्ठानचे अध्यक्ष मनोज माळी यांनी सातारा जिल्हाधिकारी आणि खासदार श्रीमंत छत्रपती उदयनराजे भोसले यांच्याकडे केली आहे. ऊस दराबाबत तोडगा न निघाल्यास शेतकऱ्यांच्या समर्थनार्थ रक्षक प्रतिष्ठानही आंदोलनात सहभागी होईल, असा इशारा मनोज माळी यांनी दिला.

पुणे-बंगळुरू महामार्गाला पर्यायी मार्ग कोणते?

स्वाभिमानी शेतकरी संघटनेच्या आंदोलनामुळे पुणे-बंगळुरू महामार्गावरील वाहतूक प्रभावित झाल्याने प्रशासनाने पर्यायी मार्गांचा वापर करण्याचे आवाहन केले आहे.

कोल्हापूरहून साताऱ्याकडे जाणाऱ्या वाहनांसाठी लक्ष्मी टेकडी, कागल एमआयडीसी, शिरोली, सांगली फाटा, पेठ नाका, इस्लामपूर, आष्टा, सांगली आणि रहिमतपूरमार्गे वाहतूक वळवण्यात आली आहे.

तसेच कोल्हापूर-सांगली-सोलापूर मार्गे पुणे आणि कर्नाटककडे, तर कोल्हापूरमार्गे रत्नागिरी आणि मुंबईकडे जाणारी वाहतूक सुरू असल्याची माहिती देण्यात आली आहे. मात्र, मालवाहू वाहनांची कोंडी कायम असल्याचे वृत्त आहे.

ऊसाच्या पहिल्या उचलीचा प्रश्न आणि शेतकरी संघटनेचे आंदोलन यावर सरकार काय निर्णय घेते, याकडे पश्चिम महाराष्ट्रातील शेतकरी, साखर कारखानदार आणि वाहतूकदारांचे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा