राजकारणात शत्रुत्व नसतं, फक्त विचारधारा वेगळ्या असतात; अमृता फडणवीस यांची प्रतिक्रिया

मुंबई : मुख्यमंत्री देवेंद्र फडणवीस, शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि मनसेप्रमुख राज ठाकरे हे तिघेही एका कार्यक्रमात एकाच मंचावर आल्याने महाराष्ट्राच्या राजकीय वर्तुळात चर्चांना उधाण आले आहे. व्यंगचित्रकार प्रशांत कुलकर्णी यांच्या ‘महाराष्ट्राची हास्यरेषा’ या पुस्तकाच्या प्रकाशन सोहळ्यात दादर येथील स्वातंत्र्यवीर सावरकर सभागृहात हे तिन्ही नेते उपस्थित होते. आता या भेटीवर मुख्यमंत्री देवेंद्र फडणवीस यांच्या पत्नी अमृता फडणवीस यांनी प्रतिक्रिया दिली आहे.

राजकारणात शत्रुत्व नसते, तर वेगवेगळ्या विचारधारा असतात. त्यामुळे वैयक्तिक पातळीवर एकमेकांना शत्रू मानू नये, असे मत अमृता फडणवीस यांनी व्यक्त केले.

‘राजकारणात शत्रुत्व नसतं, विचारधारा वेगळ्या असतात’

देवेंद्र फडणवीस, उद्धव ठाकरे आणि राज ठाकरे यांची एकाच मंचावरील उपस्थिती चर्चेचा विषय ठरल्यानंतर अमृता फडणवीस यांनी या भेटीबाबत आपली भूमिका मांडली. राजकीय मतभेद असले तरी वैयक्तिक संबंधांमध्ये शत्रुत्व असण्याची गरज नाही, असे त्यांनी स्पष्ट केले.

या तिन्ही नेत्यांमध्ये कार्यक्रमापूर्वी ग्रीन रूममध्ये काही वेळ बंद दाराआड चर्चा झाल्याचीही माहिती समोर आली होती. त्यामुळे त्यांच्या भेटीचा राजकीय अर्थ लावला जात होता.

हेही वाचा –  कराटेमध्ये गाथा लोखंडेची सुवर्णपदकाची कमाई

‘महाराष्ट्राची हास्यरेषा’ कार्यक्रमात फडणवीसांची टोलेबाजी

व्यंगचित्रकार प्रशांत कुलकर्णी यांच्या ‘महाराष्ट्राची हास्यरेषा’ या पुस्तकाच्या प्रकाशन सोहळ्यात देवेंद्र फडणवीस यांनीही आपल्या भाषणातून जुन्या आठवणी सांगत मिश्किल टिप्पणी केली होती.

२०१९ पूर्वी उद्धव ठाकरे यांचा फोन आला की आपण त्यांना भेटण्यासाठी जात होतो. मात्र, २०१९ नंतर त्यांच्या फोनची वाट पाहत राहिलो, पण फोन आला नाही, अशा आशयाचे वक्तव्य फडणवीस यांनी केले.

राज ठाकरे यांच्या व्यंगचित्रकलेचा उल्लेख करताना, आपले व्यंगचित्र काढताना पोट मोठे दाखवण्याऐवजी नाक किंवा कान मोठे दाखवावेत, अशी विनंती आपण पूर्वी केल्याची आठवणही त्यांनी सांगितली.

‘राजकारण आमच्यावर सोपवा’, फडणवीसांचा मिश्किल टोला

राज ठाकरे यांना व्यंगचित्रकलेची, तर उद्धव ठाकरे यांना छायाचित्रणाची आवड आहे. त्यामुळे दोघांनी आपापल्या आवडीच्या क्षेत्रात काम करावे आणि राजकारण आपल्यावर सोपवावे, असा मिश्किल चिमटा मुख्यमंत्री फडणवीस यांनी काढला.

या कार्यक्रमात तिन्ही नेत्यांची भाषणे हलक्या-फुलक्या शैलीत झाली. राजकीय मतभेद असूनही सांस्कृतिक आणि साहित्यिक कार्यक्रमांमध्ये एकत्र येण्याची महाराष्ट्राची परंपरा जपली पाहिजे, असे मत फडणवीस यांनी व्यक्त केले.

फडणवीस म्हणाले, भेटीचा राजकीय अर्थ काढू नका

या भेटीबाबत बोलताना देवेंद्र फडणवीस यांनी हा साहित्य आणि व्यंगचित्रकलेशी संबंधित कार्यक्रम असल्याचे स्पष्ट केले. आपण तिघेही साहित्यप्रेमी म्हणून या कार्यक्रमाला उपस्थित राहिलो होतो. भाषणांमध्ये हलकी-फुलकी टोलेबाजी झाली, यातून महाराष्ट्राची संस्कृती दिसून येते. विचार वेगळे असले आणि राजकीय टीका होत असली तरी अशा कार्यक्रमांत एकत्र येता येते. त्यामुळे या भेटीचा वेगळा राजकीय अर्थ काढण्याची गरज नाही, असे त्यांनी सांगितले.

दरम्यान, या भेटीमुळे राज्याच्या राजकारणात नव्या समीकरणांची चर्चा सुरू झाली असली, तरी तिन्ही नेत्यांच्या एकत्र उपस्थितीला सांस्कृतिक कार्यक्रमाचा संदर्भ असल्याचे फडणवीस यांनी स्पष्ट केले आहे.

महाईन्यूज-X वर फॉलो करा : महाईन्यूजला instagram वर फॉलो करा