शिवसेना-भाजप युती अभेद्य; मतभेद चर्चेतून सोडवू, युती तुटणार नाही : राज्यमंत्री योगेश कदम

वसई : शिवसेना आणि भाजप यांच्यात काही विषयांवर मतभेद असतील, तर ते चर्चेतून सोडवले पाहिजेत. संबंधितांशी संवाद साधून बैठकीत हे विषय मांडावेत आणि त्यावर स्पष्ट भूमिका घ्यावी, असे मत गृह व अन्न व औषध प्रशासन राज्यमंत्री योगेश कदम यांनी व्यक्त केले. शिवसेना आणि भाजपची युती अभेद्य असून ती कधीही तुटणार नाही, असा विश्वासही त्यांनी व्यक्त केला.

कौटुंबिक नात्याप्रमाणे युतीतही मतभेद असू शकतात

शिवसेना आणि भाजप यांच्यातील संबंधांवर बोलताना योगेश कदम म्हणाले की, दोन्ही पक्षांमध्ये कौटुंबिक नात्यासारखे संबंध आहेत. कुटुंब म्हटले की छोट्या-मोठ्या कुरबुरी आणि भांडणे होत असतात. मात्र, त्याचा अर्थ संसार मोडणार असा होत नाही. त्याचप्रमाणे युतीमध्येही काही मतभेद असू शकतात; पण त्यामुळे युती तुटणार नाही.

मतभेद असतील तर ते संबंधितांशी चर्चा करून सोडवणे आवश्यक आहे. बैठकीत हे विषय मांडून त्यावर स्पष्ट भूमिका घेतली पाहिजे, असेही त्यांनी सांगितले.

SIR प्रक्रियेवरून विरोधकांवर निशाणा

गृह व अन्न व औषध प्रशासन राज्यमंत्री योगेश कदम हे वसई येथे कार्यकर्ता संवाद दौऱ्यानिमित्त आले होते. यावेळी प्रसारमाध्यमांशी बोलताना त्यांनी एसआयआर (SIR) प्रक्रियेवरून विरोधकांवर टीका केली.

एसआयआर प्रक्रियेमुळे घटनात्मक संस्थांच्या विश्वासार्हतेवर प्रश्नचिन्ह निर्माण होत असेल, तर देशातील नागरिक जागरूक आहेत. अशा परिस्थितीत याचे खापर आमच्यावर फोडणे चुकीचे आहे, असे कदम म्हणाले. एसआयआर प्रक्रिया यापूर्वीही राबवण्यात आली होती; मात्र आता या प्रक्रियेवरून राजकीय आरोप केले जात असल्याचे त्यांनी नमूद केले.

हेही वाचा –  दिवाळीपूर्वी पर्यटकांसाठी आनंदाची बातमी! दीड महिन्यानंतर रायगड रोप-वे सेवा पुन्हा सुरू

बांगलादेशी घुसखोरीचा मुद्दा उपस्थित

पश्चिम बंगालमधून बांगलादेशी नागरिक भारतात घुसखोरी करत असल्याचा मुद्दाही योगेश कदम यांनी उपस्थित केला. अशा घुसखोरीच्या वेळी संबंधित राज्य सरकार काय करत होते, असा सवाल त्यांनी केला.

बेकायदेशीररीत्या वास्तव्यास असलेल्यांविरोधात कारवाईचा दावा

महाराष्ट्रात गेल्या काही वर्षांत गृह विभागाच्या माध्यमातून बेकायदेशीररीत्या वास्तव्यास असलेल्या बांगलादेशी नागरिकांविरोधात मोठ्या प्रमाणात कारवाई करण्यात आल्याचा दावा कदम यांनी केला. गुप्तचर यंत्रणांकडून मिळालेल्या माहितीच्या आधारे अनेकांचा शोध घेण्यात आला असून, त्यांची हद्दपारी करण्यात आल्याचेही त्यांनी सांगितले.

महाईन्यूज-X वर फॉलो करा : महाईन्यूजला instagram वर फॉलो करा