पुण्याला जागतिक आर्थिक केंद्र बनविण्याची तयारी; विकास आराखड्याचा सुनेत्रा पवारांकडून आढावा

पुणे : पुणे महानगर प्रदेशाचा सर्वांगीण विकास करून पुण्याला जागतिक दर्जाचे आर्थिक केंद्र बनविण्याच्या उद्देशाने राबविण्यात येणाऱ्या ‘पुणे ग्रोथ हब’ उपक्रमाच्या विकास आराखड्याचा उपमुख्यमंत्री तथा पालकमंत्री सुनेत्रा अजित पवार यांनी जिल्हाधिकारी कार्यालयात आढावा घेतला. या उपक्रमाच्या पहिल्या टप्प्यासाठी केंद्र शासनाकडे पाच हजार कोटी रुपयांच्या निधीची मागणी करण्यात येणार असून, नोव्हेंबरअखेर बृहद् विकास आराखडा केंद्राकडे सादर करण्याचे नियोजन आहे.

विविध विभागांच्या अधिकाऱ्यांची उपस्थिती

या बैठकीला माजी मुख्य सचिव तथा सहाव्या राज्य वित्त आयोगाचे अध्यक्ष डॉ. नितीन करीर, विभागीय आयुक्त शीतल तेली-उगले, महामेट्रोचे व्यवस्थापकीय संचालक श्रावण हर्डीकर, पुणे महानगरपालिका आयुक्त नवल किशोर राम, पिंपरी-चिंचवड महानगरपालिका आयुक्त विजय सूर्यवंशी, पुणे महानगर प्रदेश विकास प्राधिकरणाचे आयुक्त अभिजित चौधरी, जिल्हाधिकारी जितेंद्र डुडी आणि जिल्हा परिषदेचे मुख्य कार्यकारी अधिकारी गजानन पाटील उपस्थित होते.

नीती आयोगाच्या उपक्रमात पुण्याचा समावेश

नीती आयोगाच्या पुढाकाराने देशातील मुंबई, सुरत, वाराणसी आणि विशाखापट्टणम् या शहरांमध्ये ‘ग्रोथ हब’ उपक्रम राबविण्यात येत आहे. या उपक्रमात पुण्याचाही समावेश करण्यात आला आहे. यासाठी मागील वर्षी ऑगस्ट महिन्यात महाराष्ट्र शासन, नीती आयोग आणि पुणे इंटरनॅशनल सेंटर यांच्यात सामंजस्य करार करण्यात आला होता.

या उपक्रमाच्या नियोजनासाठी स्थापन करण्यात आलेल्या समन्वय समितीची बैठक आज पार पडली. पुणे महानगर प्रदेशाच्या विकासासाठी विविध विभागांकडून सूचना आणि प्रस्ताव मागवून त्यांचा विचार केला जात आहे.

हेही वाचा –  चारा टंचाईवर मात करण्यासाठी राज्याचा व्यापक कृती आराखडा; जिल्हा वार्षिक योजनेत ५ टक्के निधीची तरतूद

औद्योगिक, आयटी आणि शिक्षण क्षेत्रांवर भर

पुणे महानगर प्रदेशातील औद्योगिक, माहिती तंत्रज्ञान, वाहन उद्योग, शिक्षण, विमान वाहतूक, आरोग्य, कृषी आणि संशोधन अशा विविध क्षेत्रांतील विकासाच्या संधी विचारात घेऊन विकास आराखडा तयार करण्यात येत आहे. संबंधित विभागांच्या प्रस्तावांचा समन्वय साधून भविष्यातील विकासाची दिशा निश्चित केली जात आहे.

पहिल्या टप्प्यात ५ हजार कोटींच्या निधीची मागणी

येत्या नोव्हेंबरअखेर पुणे ग्रोथ हबचा बृहद् विकास आराखडा मुख्यमंत्र्यांच्या अध्यक्षतेखालील शिखर समितीमार्फत केंद्र शासनाकडे सादर करण्यात येणार आहे. या प्रकल्पाच्या पहिल्या टप्प्यासाठी केंद्र शासनाकडून पाच हजार कोटी रुपयांचा निधी मिळावा, अशी मागणी करण्यात येणार आहे.

२०३६ पर्यंत आर्थिक गुंतवणुकीचे उद्दिष्ट

सन २०३६ पर्यंतच्या पुढील दहा वर्षांच्या कालावधीत या उपक्रमाच्या माध्यमातून मोठ्या प्रमाणावर आर्थिक गुंतवणूक अपेक्षित आहे. या गुंतवणुकीतून पुणे महानगर प्रदेशातील पायाभूत सुविधा, उद्योग आणि विविध क्षेत्रांचा विकास साधण्याचे नियोजन आहे.

पुण्याला जागतिक दर्जाचे आर्थिक केंद्र बनविण्याच्या दृष्टीने ‘पुणे ग्रोथ हब’ उपक्रम महत्त्वपूर्ण ठरणार असून, त्यासाठी शासनाकडून नियोजनबद्ध प्रयत्न करण्यात येत असल्याचे बैठकीत नमूद करण्यात आले.

महाईन्यूज-X वर फॉलो करा : महाईन्यूजला instagram वर फॉलो करा