मनीषा भानवालाने रचला इतिहास! जागतिक कुस्ती अजिंक्यपद स्पर्धेत सुवर्ण जिंकणारी पहिली भारतीय महिला

Manisha Bhanwala Gold Medal | भारताची स्टार कुस्तीपटू मनीषा भानवाला हिने जागतिक कुस्ती अजिंक्यपद स्पर्धेत ऐतिहासिक सुवर्णपदकाला गवसणी घालत भारतीय क्रीडाजगताच्या शिरपेचात मानाचा तुरा रोवला आहे. ५९ किलो वजन गटाच्या रोमहर्षक अंतिम लढतीत मनीषाने अमेरिकेच्या बलाढ्य अबीगेल नेटला ८-६ अशा फरकाने धूळ चारली. या ऐतिहासिक विजयासह जागतिक कुस्ती स्पर्धेत सुवर्णपदक पटकावणारी ती पहिलीच भारतीय महिला कुस्तीपटू ठरली आहे. एकंदरीत जागतिक स्पर्धेत सुवर्ण जिंकणारी ती सुशील कुमारनंतरची (२०१०) दुसरीच भारतीय मल्ल बनली आहे.

अमेरिकेच्या पॅन-अमेरिकन चॅम्पियन अबीगेल नेटविरुद्धच्या अंतिम सामन्याची सुरुवात मनीषासाठी अत्यंत खडतर झाली होती. पहिल्या सत्रात ती १-६ अशी मोठी पिछाडीवर होती. मात्र, दुसऱ्या सत्रात मनीषाने आक्रमक चाली रचत सामन्याचे चित्र पालटले. सलग सात गुण वसूल करत तिने सामन्यावर पूर्ण नियंत्रण मिळवले आणि ८-६ अशा स्कोअरसह ऐतिहासिक सुवर्णपदक आपल्या नावावर केले.

हेही वाचा

इस्रोची गगनभरारी! ‘GSLV-F18’ कडून NVS-03 उपग्रहाचे यशस्वी प्रक्षेपण

सुवर्णपदकापर्यंतचा प्रवास

हरियाणाच्या जींद येथील २९ वर्षीय मनीषाने या स्पर्धेत सुरुवातीपासूनच आपले निर्विवाद वर्चस्व राखले:

• पहिली फेरी: जागतिक कांस्यपदक विजेत्या लॉरेन्स ब्यूरेगार्डला पराभूत करून आगेकूच.
• उपांत्यपूर्व फेरी: मंगोलियाच्या बोलोरतुया खुरेलखूवर मात.
• उपांत्य फेरी: यजमान कझाकस्तानच्या अल्तीन शागायेवाला पराभवाचा धक्का देत अंतिम फेरीत प्रवेश.
  आशियाई क्रीडा स्पर्धेत ५७ किलो गटातील अपयशानंतर मनीषाने घेतलेला ५९ किलो गटात खेळण्याचा निर्णय तिच्या कारकिर्दीला सुवर्ण झळाळी देऊन गेला.

भारतीय महिला कुस्तीचा डंका

या स्पर्धेत भारतीय महिला मल्लांनी जबरदस्त कामगिरी नोंदवली. मनीषाच्या सुवर्णपदकाव्यतिरिक्त ऑलिम्पिक वजन गटांमध्ये नीलम सिरोही (५० किलो) आणि काजळ ढोचक (७६ किलो) यांनी अंतिम फेरीत धडक मारत रौप्यपदके पटकावली. यापूर्वी भारतासाठी २०२१ मध्ये अंशु मलिकने जागतिक स्पर्धेत रौप्य, तर विनेश फोगट आणि अंतिम पंघाल यांनी कांस्यपदके जिंकली होती.

महाईन्यूज-X वर फॉलो करा : महाईन्यूजला instagram वर फॉलो करा