विराट कोहलीच्या मदतीने फटाकेमुक्त दिवाळीचा संदेश द्या! सर्वोच्च न्यायालयाचा केंद्राला सल्ला

नवी दिल्ली : दिवाळीचा सण प्रदूषणमुक्त आणि पर्यावरणपूरक पद्धतीने साजरा करण्यासाठी लोकप्रिय क्रिकेटपटू विराट कोहली यांच्यासह विविध क्षेत्रांतील प्रसिद्ध व्यक्तींची मदत घ्या, असा सल्ला सर्वोच्च न्यायालयाने केंद्र सरकारला दिला आहे. वाढत्या वायू प्रदूषणाच्या पार्श्वभूमीवर फटाकेमुक्त दिवाळीचा संदेश प्रभावीपणे जनतेपर्यंत पोहोचवण्यासाठी सेलिब्रिटींच्या लोकप्रियतेचा उपयोग करण्याचे न्यायालयाने सुचवले. यासंदर्भात ‘लाइव्ह लॉ’ने वृत्त दिले आहे.

दिल्ली आणि लगतच्या परिसरातील वायू प्रदूषणासंदर्भातील याचिकेवर न्यायमूर्ती एम. एम. सुंदरेश आणि न्यायमूर्ती पी. बी. वराळे यांच्या खंडपीठासमोर सुनावणी झाली. या वेळी फटाक्यांवरील निर्बंधांची माहिती दूरदर्शन, वर्तमानपत्रे आणि अन्य प्रसारमाध्यमांच्या माध्यमातून प्रभावीपणे जनतेपर्यंत पोहोचवण्याचे निर्देश न्यायालयाने प्रशासनाला दिले.

विराट कोहलीसारख्या लोकप्रिय खेळाडूंच्या सहभागाचा सल्ला

सुनावणीदरम्यान न्यायमूर्ती पी. बी. वराळे यांनी जनजागृतीसाठी खेळाडू आणि विविध क्षेत्रांतील नामवंत व्यक्तींचे सहकार्य घेण्याची सूचना केली. त्यानंतर न्यायमूर्ती एम. एम. सुंदरेश यांनी विराट कोहलीसारख्या लोकप्रिय क्रिकेटपटूंना आवाहन केल्यास ते या मोहिमेत मदत करू शकतात, असे मत व्यक्त केले.

‘या वर्षीची दिवाळी सर्वांसाठी खऱ्या अर्थाने आनंददायी बनवूया आणि दिव्यांच्या सणाचा खरा उत्साह अनुभवूया,’ अशा आशयाचा संदेश लोकप्रिय व्यक्तींच्या माध्यमातून लोकांपर्यंत पोहोचवता येईल, असे न्यायालयाने सुचवले.

दिवाळी हा मुळात दिव्यांचा सण आहे. फटाक्यांमुळे निर्माण होणाऱ्या प्रदूषणाच्या समस्येकडे लक्ष वेधत, सणाचा आनंद इतरांना त्रास न देता साजरा करण्याचे महत्त्वही न्यायालयाने अधोरेखित केले.

हेही वाचा –  ‘२०१९ नंतर उद्धवजींनी मला बोलवलंच नाही, नाहीतर मी गेलो असतो’; फडणवीसांचा ठाकरेंना मिश्किल टोला!

लहान मुले आणि तरुणांच्या सहभागातून जनजागृती

फटाक्यांमुळे होणाऱ्या प्रदूषणाविरोधातील मोहिमेत शाळकरी मुलांचा सहभाग महत्त्वाचा ठरू शकतो, असे न्यायालयाने नमूद केले. यासाठी शिक्षण विभागाला विशेष निर्देश देण्याची गरजही व्यक्त करण्यात आली.

लहान मुलांना प्रदूषणाचे दुष्परिणाम समजावून सांगितल्यास ते स्वतःहून पालकांना फटाके न वाजवण्याचे आवाहन करू शकतात. तरुण पिढीला दिवाळी साजरी करायची आहे; मात्र त्यासाठी फटाके वाजवणे आवश्यक नाही, हा विचार समाजात रुजवता येऊ शकतो. अशा प्रयत्नांचा समाजावर सकारात्मक परिणाम होईल, असे निरीक्षण न्यायालयाने नोंदवले.

लहान मुले, ज्येष्ठ नागरिक आणि प्राण्यांचा विचार करण्याचे आवाहन

सण साजरा करताना लहान मुले, ज्येष्ठ नागरिक, आजारी व्यक्ती आणि दिव्यांग नागरिक यांना त्रास होणार नाही, याची काळजी घेणे आवश्यक आहे. फटाक्यांमुळे पशुपक्षी आणि पर्यावरणावरही परिणाम होतो. त्यामुळे सणाचा आनंद साजरा करताना इतरांच्या आरोग्याचा आणि निसर्गाचा विचार केला पाहिजे, असे न्यायालयाने स्पष्ट केले.

धार्मिक स्वातंत्र्यासोबत सार्वजनिक आरोग्यही महत्त्वाचे

सर्वोच्च न्यायालयाने दिवाळीशी संबंधित धार्मिक भावना आणि परंपरांचा आदर करण्याची भूमिका मांडली. मात्र, धार्मिक स्वातंत्र्याबरोबरच सार्वजनिक आरोग्य आणि नागरिकांचे मूलभूत हक्क यांनाही महत्त्व दिले पाहिजे, असे न्यायालयाने नमूद केले.

महाईन्यूज-X वर फॉलो करा : महाईन्यूजला instagram वर फॉलो करा