‘२०१९ नंतर उद्धवजींनी मला बोलवलंच नाही, नाहीतर मी गेलो असतो’; फडणवीसांचा ठाकरेंना मिश्किल टोला!

मुंबई : महाराष्ट्राच्या राजकारणातील तीन प्रमुख नेते मुख्यमंत्री देवेंद्र फडणवीस, शिवसेना (ठाकरे गट) पक्षप्रमुख उद्धव ठाकरे आणि मनसे अध्यक्ष राज ठाकरे एकाच व्यासपीठावर आल्याने राजकीय वर्तुळाचे लक्ष वेधले गेले. ज्येष्ठ व्यंगचित्रकार प्रशांत कुलकर्णी संपादित ‘महाराष्ट्राच्या हास्यरेषा’ या पुस्तकाच्या प्रकाशन सोहळ्यात तिन्ही नेते उपस्थित होते. यावेळी मुख्यमंत्री देवेंद्र फडणवीस यांनी आपल्या भाषणात मिश्किल टोले लगावत उद्धव ठाकरे यांच्याबाबत केलेल्या विधानाने उपस्थितांमध्ये हशा पिकला.

‘२०१९ नंतर उद्धवजींनी मला बोलवलंच नाही’

भाषणादरम्यान देवेंद्र फडणवीस यांनी राज ठाकरे यांच्या विधानाचा संदर्भ देत आशिष शेलार यांचाही उल्लेख केला. “राज ठाकरेंनी फोन केला की देवेंद्र फडणवीस येतात,” असे आशिष शेलार म्हणाल्याचे त्यांनी सांगितले.

यानंतर फडणवीस म्हणाले, “आशिषजी, २०१९ पर्यंत उद्धवजींनी जेव्हा-जेव्हा मला फोन केला, तेव्हा-तेव्हा मी आलो. पण २०१९ नंतर उद्धवजींनी मला बोलवलंच नाही. नाहीतर मी गेलो असतो. मी वाटच पाहत राहिलो.”

मुख्यमंत्र्यांच्या या विधानामुळे सभागृहात हशा पिकला. कार्यक्रमातील शेवटचे भाषण आपल्याकडे असल्याचा फायदा घेत असल्याचे सांगत त्यांनी पुन्हा एकदा मिश्किल टिप्पणी केली. त्यावर उपस्थितांनीही हसून दाद दिली.

हेही वाचा –  एमपीएससी पेपरफुटी प्रकरणाची चौकशी; तुकाराम मुंढेंकडून विद्यार्थ्यांना मोठं आवाहन, १६ नोव्हेंबरपर्यंत तक्रार करा!

व्यंगचित्रकारांसाठी महाराष्ट्रात स्वतंत्र दालन उभारणार

‘महाराष्ट्राच्या हास्यरेषा’ या पुस्तकातून मराठी व्यंगचित्रकलेचा शंभर वर्षांचा प्रवास उलगडण्यात आला आहे. ग्रंथाली प्रकाशनाच्या वतीने दादर येथील स्वातंत्र्यवीर सावरकर स्मारक सभागृहात हा प्रकाशन सोहळा आयोजित करण्यात आला होता.

या कार्यक्रमाला उपस्थित राहण्याचा आनंद व्यक्त करत फडणवीस यांनी व्यंगचित्रकारांच्या योगदानाचे कौतुक केले. व्यंगचित्र हे केवळ हास्य निर्माण करणारे माध्यम नसून, समाज आणि राजकारणातील घडामोडींवर नेमके भाष्य करणारी कला असल्याचे त्यांनी सांगितले.

महाराष्ट्रात व्यंगचित्रकारांसाठी स्वतंत्र दालन उभारण्याचा प्रयत्न केला जाईल. यासाठी राज ठाकरे आणि उद्धव ठाकरे यांची मदत घेऊ, असेही फडणवीस यांनी स्पष्ट केले.

‘माझं नाक मोठं काढा, पण पोट मोठं काढू नका’

व्यंगचित्रकार आपली चित्रे काढताना राजकीय नेत्यांवरही उपरोधिक भाष्य करतात. याच मुद्द्यावर बोलताना फडणवीस यांनी राज ठाकरे यांच्याकडे केलेल्या एका विनंतीचा किस्सा सांगितला.

“मी राज ठाकरेंना विनंती केली होती की, माझं नाक मोठं काढा; पण माझं पोट मोठं काढू नका,” असे ते म्हणाले. आता आपण पोट कमी केल्यामुळे इतर व्यंगचित्रकार आपल्याला सोडतील, अशी मिश्किल टिप्पणीही त्यांनी केली.

व्यंगचित्रांमधून एखाद्या विषयाचा सारांश प्रभावीपणे मांडला जातो. अग्रलेखातून परिस्थितीचे आकलन करून दिले जाते, तर व्यंगचित्र त्याच परिस्थितीचे चित्ररूप भाष्य करते, असे मतही मुख्यमंत्र्यांनी व्यक्त केले.

राजकीय नेत्यांच्या एकत्रित उपस्थितीची चर्चा

या पुस्तक प्रकाशन सोहळ्यात देवेंद्र फडणवीस, उद्धव ठाकरे आणि राज ठाकरे एकाच मंचावर आल्याने राजकीय चर्चांना उधाण आले. कार्यक्रमाच्या निमित्ताने तिन्ही नेत्यांची भेट आणि त्यांच्यातील संवाद याकडेही राजकीय वर्तुळाचे लक्ष लागले.

मात्र, कार्यक्रमातील भाषणांपलीकडे कोणतीही राजकीय चर्चा किंवा निर्णय झाल्याची अधिकृत माहिती समोर आलेली नाही. सध्या या सोहळ्यातील नेत्यांच्या मिश्किल विधानांची आणि व्यंगचित्रकारांसाठी स्वतंत्र दालन उभारण्याच्या मुख्यमंत्र्यांच्या घोषणेची चर्चा सुरू आहे.

महाईन्यूज-X वर फॉलो करा : महाईन्यूजला instagram वर फॉलो करा