राहुल गांधींना मानहानी खटल्यात दिलासा; सुलतानपूर न्यायालयाकडून निर्दोष मुक्तता
अमित शाह यांच्याबाबतच्या विधानावरून दाखल झाला होता खटला; २०१८ मधील वक्तव्याच्या प्रकरणाचा २६ ऑक्टोबरला निकाल

सुलतानपूर : काँग्रेस नेते राहुल गांधी यांना उत्तर प्रदेशातील सुलतानपूर येथील खासदार-आमदार न्यायालयाने मानहानीच्या खटल्यातून निर्दोष मुक्त केले आहे. भाजपच्या तत्कालीन अध्यक्षांबाबत केलेल्या विधानावरून त्यांच्याविरोधात हा खटला दाखल करण्यात आला होता. २६ ऑक्टोबर रोजी राहुल गांधी न्यायालयात हजर झाले. त्यानंतर अवघ्या १६ मिनिटांत न्यायालयाने निकाल दिल्याचे वृत्त आहे.
राहुल गांधी यांनी ८ मे २०१८ रोजी बंगळुरू येथे पत्रकार परिषदेत भाजपचे तत्कालीन राष्ट्रीय अध्यक्ष अमित शाह यांच्याबाबत विधान केले होते. ‘प्रामाणिकपणाबद्दल बोलणाऱ्या पक्षाच्या अध्यक्षांवर खुनाचा आरोप आहे,’ अशा आशयाच्या त्यांच्या वक्तव्यावरून भाजप नेते विजय मिश्रा यांनी ऑगस्ट २०१८ मध्ये मानहानीची तक्रार दाखल केली होती.
निर्दोष मुक्ततेसाठी कोणते मुद्दे मांडले?
राहुल गांधी यांच्या वतीने युक्तिवाद करताना त्यांच्या वकिलांनी काही महत्त्वाचे मुद्दे मांडले. राहुल गांधी यांनी न्यायालयात त्यांच्या संपूर्ण विधानाची सीडी सादर केली होती. कोणाचीही बदनामी करण्याचा आपला हेतू नव्हता, अशी भूमिका त्यांनी घेतल्याचे वृत्त आहे.
तक्रारदार विजय मिश्रा यांचा संबंधित विधानाशी थेट संबंध नसल्याचा मुद्दाही बचाव पक्षाने मांडला. तसेच, राहुल गांधी यांच्या विधानामुळे तक्रारदाराची मानहानी झाल्याचे सिद्ध होत नसल्याचा युक्तिवाद करण्यात आला. न्यायालयाने या प्रकरणात राहुल गांधी यांची निर्दोष मुक्तता केली.
या खटल्यात ज्येष्ठ वकील आर. एस. चीमा आणि काशी शुक्ला यांनी राहुल गांधी यांची बाजू मांडली. भाजप नेते विजय मिश्रा यांच्यातर्फे संतोष कुमार पांडे यांनी युक्तिवाद केला.‘न्यायालयाचा वेळ वाया घालवू नये’
हेही वाचा – मनोज जरांगे पाटलांचा मोठा दावा; ‘माझ्याकडे आणखी चार ऑडिओ क्लिप, हळूहळू बाहेर काढणार!’
मोदी आडनाव प्रकरणात झाली होती शिक्षा
दरम्यान, राहुल गांधी यांना यापूर्वी मोदी आडनावासंदर्भातील विधानामुळे मानहानीच्या खटल्याला सामोरे जावे लागले होते. २०१९ मध्ये कर्नाटकातील कोलार येथे निवडणूक प्रचारादरम्यान त्यांनी ‘सर्व चोरांचे आडनाव मोदीच का असते?’ असे विधान केले होते. या प्रकरणात गुजरातमधील न्यायालयाने २०२३ मध्ये त्यांना दोन वर्षांच्या तुरुंगवासाची शिक्षा सुनावली होती.
या शिक्षेमुळे त्यांचे लोकसभा सदस्यत्व रद्द झाले होते. मात्र, सर्वोच्च न्यायालयाने शिक्षेला स्थगिती दिल्यानंतर त्यांचे संसद सदस्यत्व पुन्हा बहाल करण्यात आले.
सुलतानपूर येथील मानहानी खटल्यातील निर्दोष मुक्ततेमुळे राहुल गांधी यांना आणखी एका कायदेशीर प्रकरणात दिलासा मिळाला आहे.




