‘आता केवळ शस्त्रांनी नव्हे, अर्थव्यवस्था कमकुवत करूनही युद्ध जिंकता येते’; सायबर सुरक्षेवर पंतप्रधान मोदींचा भर

भुवनेश्वर : आधुनिक काळात युद्धाचे स्वरूप बदलत असून, केवळ शस्त्रास्त्रांच्या जोरावरच नव्हे, तर एखाद्या देशाची अर्थव्यवस्था कमकुवत करूनही त्याला पराभूत करता येऊ शकते, असे प्रतिपादन पंतप्रधान नरेंद्र मोदी यांनी केले. भारताच्या बँकिंग व्यवस्थेचे सायबर गुन्हेगार आणि सायबर दहशतवाद्यांपासून संरक्षण करणे अत्यंत महत्त्वाचे असल्याचे त्यांनी सांगितले.

भुवनेश्वर येथे भारतीय रिझर्व्ह बँकेच्या (RBI) डेटा सेंटर आणि सायबर सुरक्षा प्रशिक्षण संस्थेचे उद्घाटन करताना मोदी बोलत होते. बदलत्या सायबर धोक्यांचा सामना करण्यासाठी आधुनिक पायाभूत सुविधा, सक्षम संगणकीय प्रणाली आणि प्रशिक्षित मनुष्यबळ उभारण्याची गरज त्यांनी अधोरेखित केली.

बँकिंग व्यवस्थेच्या सायबर सुरक्षेला प्राधान्य

भारताची अर्थव्यवस्था मजबूत होत असताना देशाच्या बँकिंग व्यवस्थेचे सायबर गुन्हेगार आणि सायबर दहशतवाद्यांपासून संरक्षण करणेही तितकेच आवश्यक असल्याचे मोदी म्हणाले. जुन्या प्रणाली, पारंपरिक प्रशिक्षण पद्धती आणि मर्यादित साधनांच्या आधारे नव्या आव्हानांचा सामना करता येणार नाही, असे त्यांनी स्पष्ट केले.

RBI चे डेटा सेंटर आणि सायबर सुरक्षा प्रशिक्षण संस्था या देशाच्या बँकिंग पायाभूत सुविधांची सुरक्षा आणि संकटांचा सामना करण्याची क्षमता वाढवण्यात महत्त्वाची भूमिका बजावतील, असा विश्वास त्यांनी व्यक्त केला.

हेही वाचा –  ‘सरकारने अन्नधान्य, पाणी, चारा दिला नाही तर मंत्र्यांच्या घरासमोर रांगा लावा’; प्रकाश आंबेडकरांचे शेतकऱ्यांना आवाहन

लहान शहरे आणि गावांपर्यंत सुविधा पोहोचवण्यावर भर

या दोन्ही संस्थांचे उद्घाटन हे भारताच्या प्रशासकीय दृष्टिकोनातील बदलाचे प्रतीक असल्याचे मोदी म्हणाले. देशातील शेवटच्या घटकापर्यंत विकासाचे लाभ पोहोचवणे हा सरकारच्या कामकाजाचा केंद्रबिंदू असल्याचे त्यांनी सांगितले.

स्वातंत्र्यानंतर मोठ्या शहरांमध्ये रुग्णालये, विमानतळ आणि इतर महत्त्वाच्या सुविधा विकसित झाल्या; मात्र लहान शहरे आणि दुर्गम भागांना मूलभूत सुविधा तसेच संपर्कव्यवस्थेसाठी संघर्ष करावा लागला, असे त्यांनी नमूद केले.

एक्स्प्रेसवे, वैद्यकीय महाविद्यालये, आरोग्य सुविधा आणि डिजिटल कनेक्टिव्हिटीचा विस्तार लहान शहरे व गावांपर्यंत करून लोकाभिमुख आणि सक्रिय सुशासनाची व्यवस्था उभारण्याचा प्रयत्न सरकार करत असल्याचेही मोदी म्हणाले.

‘फोन बँकिंग’वरून काँग्रेसवर टीका

बँकिंग व्यवस्थेच्या विस्ताराचा उल्लेख करताना मोदी यांनी काँग्रेसच्या पूर्वीच्या सरकारांवर टीका केली. १९६० आणि १९७० च्या दशकात गरिबांच्या कल्याणाच्या उद्देशाने बँकांचे राष्ट्रीयीकरण करण्यात आले; मात्र २०१४ पर्यंत देशातील निम्मी लोकसंख्या बँकिंग व्यवस्थेच्या बाहेर होती, असा दावा त्यांनी केला.

काँग्रेसच्या काळात ‘फोन बँकिंग’च्या माध्यमातून निवडक व्यक्तींना मोठ्या प्रमाणात कर्जे दिली जात असल्याचा आरोपही मोदी यांनी केला. काही काँग्रेस नेत्यांच्या जवळच्या व्यक्तींना फोनद्वारे हजारो कोटी रुपयांची बँक कर्जे मिळत असल्याचा दावा त्यांनी केला.

केंद्रातील भाजप सरकारच्या काळात डिजिटल बँकिंगच्या माध्यमातून देशभरात वित्तीय सेवांचा विस्तार झाल्याचे मोदी यांनी सांगितले. दरम्यान, वाढत्या डिजिटल व्यवहारांच्या पार्श्वभूमीवर बँकिंग व्यवस्थेची सायबर सुरक्षा मजबूत करणे आणि नागरिकांचा आर्थिक व्यवहारांवरील विश्वास टिकवणे हे महत्त्वाचे आव्हान असल्याचे त्यांच्या भाषणातून अधोरेखित झाले.

महाईन्यूज-X वर फॉलो करा : महाईन्यूजला instagram वर फॉलो करा