दिल्ली महापालिकेत प्रदूषणाच्या चर्चेदरम्यान राडा! नगरसेवकांची धक्काबुक्की, फायली आणि पाणी फेकले

नवी दिल्ली : दिल्लीतील वाढत्या प्रदूषणावर उपाययोजनांची चर्चा करण्यासाठी आयोजित करण्यात आलेल्या महानगरपालिका सभेत अभूतपूर्व गोंधळ झाला. दिल्ली महानगरपालिका भवनातील बैठकीदरम्यान भाजप आणि आम आदमी पार्टीच्या (आप) नगरसेवकांमध्ये जोरदार वाद झाला. या गदारोळात एकमेकांवर ओरडणे, पाणी आणि फायली फेकणे, तसेच मायक्रोफोनचे नुकसान करण्याचा प्रयत्न झाल्याचे वृत्त आहे. काँग्रेसचे नगरसेवकही या वादात सहभागी झाले. परिस्थिती चिघळल्याने मार्शलना हस्तक्षेप करावा लागला आणि महापौर परवेश वाही यांना सुरक्षित स्थळी हलवण्यात आले.

विकासनिधीच्या मागणीवरून वाद

नगरसेवकांच्या प्रभागांतील विकासकामांसाठी निधी देण्याच्या मागणीवरून या वादाची सुरुवात झाल्याचे सांगितले जात आहे. ‘आप’च्या नगरसेवकांनी तत्काळ निधी उपलब्ध करून देण्याची मागणी केली. त्यावर महापौर परवेश वाही यांनी २५ लाख रुपयांचा निधी देण्याची घोषणा केली. तसेच, चालू आर्थिक वर्षात नगरसेवकांना एकूण दोन कोटी रुपये दिले जातील, असेही त्यांनी सांगितल्याचे वृत्त आहे.

मात्र, या घोषणेवर ‘आप’च्या नगरसेवकांचे समाधान झाले नाही. त्यांनी तत्काळ देण्यात येणारा निधी किमान एक कोटी रुपयांपर्यंत वाढवण्याची मागणी केल्याने दोन्ही बाजूंमधील संघर्ष अधिक तीव्र झाला.

हेही वाचा –  इथेनॉल निर्मितीला केंद्राचा मोठा झटका! उसाचा रस आणि बी-हेवी मळीपासून उत्पादनावर बंदी

महापौरांच्या खुर्चीजवळ गोंधळ; मायक्रोफोन तोडण्याचा आरोप

गदारोळादरम्यान ‘आप’च्या नगरसेविका शगुफ्ता झुबेर महापौरांच्या खुर्चीजवळ पोहोचल्याचे वृत्त आहे. त्यांनी तेथे लावलेला मायक्रोफोन तोडण्याचा प्रयत्न केल्याचा आरोप करण्यात आला आहे. विरोधी पक्षनेते अंकुश नारंग यांच्यावरही मायक्रोफोनचे नुकसान केल्याचा आरोप आहे.

दरम्यान, काँग्रेस नेत्या नाझिया दानिश आणि ‘आप’चे अंकुश नारंग यांच्यातही शाब्दिक चकमक झाली. दानिश यांनी ‘आप’च्या भूमिकेवर प्रश्न उपस्थित केले, तर नारंग यांनी त्यांच्यावर भाजपसोबत संगनमत केल्याचा आरोप केला. त्यावर प्रत्युत्तर देताना दानिश यांनी आपण भाजपमध्ये सामील होणार नसल्याचे सांगत शगुफ्ता चौधरी यांचा उल्लेख केला. या शाब्दिक संघर्षामुळे सभागृहातील वातावरण आणखी तापले.

प्रकरण शिस्तपालन समितीकडे

प्रदूषणासारख्या महत्त्वाच्या सार्वजनिक प्रश्नावर चर्चा करण्यासाठी बोलावलेल्या बैठकीतच गोंधळ आणि तोडफोडीचे आरोप झाल्याने महापालिकेच्या कामकाजावर प्रश्न उपस्थित होत आहेत. या संपूर्ण प्रकरणाची चौकशी सभागृहाच्या शिस्तपालन समितीकडे सोपवण्यात आल्याचे वृत्त आहे. संबंधित नगरसेवकांच्या वर्तनाची चौकशी करून पुढील कारवाईबाबत निर्णय घेतला जाणार आहे.

महाईन्यूज-X वर फॉलो करा : महाईन्यूजला instagram वर फॉलो करा