भारत-न्यूझीलंड मुक्त व्यापार कराराची अंमलबजावणी सुरू; भारतीय वस्तूंना न्यूझीलंडच्या बाजारपेठेत विनाशुल्क प्रवेश
नवी दिल्ली | भारत आणि न्यूझीलंडदरम्यान झालेल्या ऐतिहासिक मुक्त व्यापार कराराची (Free Trade Agreement – FTA) मंगळवारपासून प्रत्यक्ष अंमलबजावणी सुरू झाली आहे. या करारामुळे वस्त्रोद्योग आणि चामड्यासारख्या श्रमाधारित क्षेत्रांतील उत्पादनांसह भारतातील विविध वस्तूंना न्यूझीलंडच्या बाजारपेठेत विनाशुल्क (Zero-duty) थेट प्रवेश मिळणार आहे. २७ एप्रिल रोजी दोन्ही देशांदरम्यान या महत्त्वपूर्ण करारावर स्वाक्षऱ्या झाल्या होत्या. भारताचा जागतिक स्तरावरील हा १७ वा मुक्त व्यापार करार ठरला आहे.
भारताने जागतिक व्यापार विस्ताराला गती देत गेल्या पाच वर्षांत केलेला हा सातवा मोठा व्यापार करार आहे. यापूर्वी भारताने संयुक्त अरब अमिराती (UAE), मॉरिशस, युरोपियन फ्री ट्रेड असोसिएशन (EFTA), ब्रिटन, ओमान आणि ऑस्ट्रेलिया या अर्थव्यवस्थांसोबत यशस्वी व्यापार करार केले आहेत. याशिवाय, अमेरिकेसोबतच्या प्रस्तावित करारावर दीर्घकाळ सुरू असलेली चर्चा आता अंतिम टप्प्यात पोहोचली आहे.
हेही वाचा
‘सिल्वराईज ग्रुप’च्या माध्यमातून रोजगारनिर्मितीला मोठी चालना!
भारत आणि न्यूझीलंडदरम्यान एफटीए संदर्भातील चर्चा सर्वप्रथम २०१० मध्ये सुरू झाली होती. २०१५ मध्ये ही चर्चा स्थगित झाली होती; मात्र मार्च २०२५ मध्ये दोन्ही देशांनी पुन्हा संवादाला सुरुवात केली. २७ एप्रिल रोजी अंतिम स्वाक्षऱ्या झाल्यानंतर आता तो प्रत्यक्ष लागू झाला आहे. न्यूझीलंडचे पंतप्रधान ख्रिस्तोफर लक्झन यांनी या घडामोडीचे स्वागत करत समाजमाध्यमांवर लिहिले, “आजपासून भारतासोबतचा आमचा ऐतिहासिक व्यापार करार अंमलात येत आहे. पंतप्रधान नरेंद्र मोदी यांच्यासोबत मिळून केलेला हा करार दोन्ही देशांच्या अर्थव्यवस्थांना मोठी उभारी देईल. यामुळे न्यूझीलंडच्या व्यवसायांना नाममात्र शुल्कात १ अब्जांहून अधिक ग्राहकांपर्यंत पोहोचण्याची सुवर्णसंधी उपलब्ध झाली आहे.”
भारतीय उद्योग जगताकडून स्वागत
‘इंडिया-न्यूझीलंड चेंबर ऑफ कॉमर्स अँड इंडस्ट्री’ने (INZCCI) या निर्णयाचे स्वागत केले आहे. या करारामुळे विशेषतः भारतातील सूक्ष्म, लघू आणि मध्यम उद्योगांना (MSME) व्यवसायवाढीसाठी मोठे प्रोत्साहन मिळेल, असा विश्वास संघटनेने व्यक्त केला आहे. ‘आयएनझेडसीसीआय’चे मुख्य कार्यकारी सनी कौशल यांनी नमूद केले की, “हा करार दोन्ही देशांसाठी मैलाचा दगड ठरला असून, व्यापार, गुंतवणूक आणि व्यावसायिक भागीदारीच्या नव्या वाटा यामुळे खुल्या झाल्या आहेत.”
महाईन्यूज-X वर फॉलो करा : महाईन्यूजला instagram वर फॉलो करा
