गोकुळच्या विजयाने सतेज पाटील यांचा सत्ताधाऱ्यांना टोला; ‘98 मतं बाद झाली नसती तर आणखी 5 ते 6 उमेदवार जिंकले असते’

कोल्हापूर : कोल्हापूर जिल्हा सहकारी दूध उत्पादक संघ अर्थात गोकुळच्या निवडणुकीत सतेज पाटील यांच्या नेतृत्वाखालील राजर्षी शाहू शेतकरी समविचारी पॅनेलने 13 जागांवर विजय मिळवला. या विजयानंतर सतेज पाटील आणि राजू शेट्टी यांनी पत्रकार परिषद घेत आपली भूमिका मांडली. गोकुळच्या निवडणुकीत दूध उत्पादकांनी दिलेला कौल हा एकमुखी कारभाराच्या बाजूने असल्याचे सांगत, आगामी काळात साडेपाच लाख दूध उत्पादकांना केंद्रस्थानी ठेवून संचालक मंडळ काम करेल, अशी ग्वाही सतेज पाटील यांनी दिली.

‘दूध उत्पादकांनी आम्हाला बहुमत दिले’

सतेज पाटील म्हणाले, “गोकुळच्या निवडणुकीत कोल्हापूर जिल्ह्यातील दूध उत्पादकांनी आम्हाला बहुमत दिले. त्याबद्दल साडेपाच लाख शेतकरी आणि ठरावधारकांचे आभार मानतो. गोकुळमध्ये एकमुखी कारभार असावा, अशी सामान्य माणसांची अपेक्षा होती. त्याच अपेक्षेचा कौल आम्हाला मिळाला आहे.”

गोकुळ ही कोल्हापूरची अस्मिता असून, संस्थेचे महत्त्वाचे निर्णय कोल्हापुरातच झाले पाहिजेत, ही आमची भूमिका दूध उत्पादकांना पटल्याचेही त्यांनी सांगितले.

‘98 मतं बाद झाली नसती तर आणखी उमेदवार जिंकले असते’

मतमोजणीतील बाद मतांवर भाष्य करताना सतेज पाटील यांनी सांगितले की, सर्वसाधारण प्रवर्गातील 98 मते बाद ठरली. त्यातील काही मतांबाबत त्यांनी आक्षेप नोंदवला. ही मते बाद झाली नसती, तर आमचे आणखी पाच ते सहा उमेदवार निवडून आले असते, असा दावा त्यांनी केला. काही मतांवर चुकीच्या पद्धतीने शिक्का मारला गेल्याचेही त्यांनी नमूद केले.

मतमोजणी आणि फेरमोजणीच्या अर्जांबाबत बोलताना पाटील म्हणाले की, मतमोजणीच्या वेळी बाद ठरवलेली मते बाजूला काढण्यात आली होती. दोन्ही बाजूंच्या प्रतिनिधींनी ही प्रक्रिया तपासली होती. फेरमोजणीसाठी आलेल्या अर्जांवर निवडणूक निर्णय अधिकाऱ्यांनी निर्णय घेतला असून, आता निकाल जाहीर झाला आहे.

हेही वाचा –  महिला आरक्षणाच्या अंमलबजावणीसाठी केंद्र सरकारचे विशेष अधिवेशन?; परिसीमन विधेयकावर हालचालींना वेग

सत्ताधाऱ्यांना जनतेने उत्तर दिले

निवडणुकीदरम्यान झालेल्या शपथा आणि राजकीय वक्तव्यांचा उल्लेख करत सतेज पाटील यांनी सत्ताधाऱ्यांवर टीका केली. “महाराष्ट्रासारख्या पुरोगामी राज्यात आणि कोल्हापुरात सत्तेत असलेल्या लोकांकडून असे प्रकार होणे दुर्दैवी आहे. त्यांना जनतेने चांगली चपराक दिली आहे,” असे ते म्हणाले.

चंद्रकांत पाटील यांच्या वक्तव्यांनाही कोल्हापूरच्या जनतेने निकालातून उत्तर दिल्याचे त्यांनी सांगितले. मुख्यमंत्री अधिकृत दौऱ्यासाठी आले होते, असेही पाटील यांनी स्पष्ट केले.

दूध उत्पादकांना न्याय देण्याचे आश्वासन

पराभूत उमेदवारांनी निकाल खिलाडूवृत्तीने स्वीकारायला हवा होता, असे मत सतेज पाटील यांनी व्यक्त केले. काही उमेदवारांनी फेरमोजणीसाठी अर्ज केल्यामुळे निकाल प्रक्रियेत वेळ गेल्याचेही त्यांनी सांगितले.

गोकुळच्या साडेपाच हजार दूध संस्थांना न्याय देण्याची भूमिका सत्ताधारी संचालक मंडळ म्हणून घेतली जाईल, असे आश्वासन त्यांनी दिले. गोकुळची मालकी दूध उत्पादकांची असून, त्यांच्या हिताला प्राधान्य देऊन कारभार केला जाईल, असेही त्यांनी स्पष्ट केले.

महाईन्यूज-X वर फॉलो करा : महाईन्यूजला instagram वर फॉलो करा