आरकेएल गॅलक्सी इंटरनॅशनल स्कूलच्या खेळाडूंची राष्ट्रीय गतका स्पर्धेत धडाकेबाज कामगिरी!

पिंपरी | विशेष प्रतिनिधी

हरियाणामधील फत्तेहाबाद जिल्ह्यातील रतिया येथील ‘गुरु नानक डिफेन्स अँड स्पोर्ट्स अकादमी’ (जवळ गवार सिटी) येथे पार पडलेल्या ‘१० व्या राष्ट्रीय सब-ज्युनिअर आणि ज्युनिअर गतका चॅम्पियनशिप २०२६’ (पुरुष व महिला) मध्ये आर. के. एल. गॅलक्सी इंटरनॅशनल स्कूल, वडमुखवाडी च्या विद्यार्थ्यांनी राष्ट्रीय स्तरावर उल्लेखनीय यश संपादन केले आहे.

या प्रतिष्ठेच्या राष्ट्रीय अजिंक्यपद स्पर्धेत आरकेएल गॅलक्सी इंटरनॅशनल स्कूलच्या ‘सिंगल सोटी’ (Single Soti) संघाने अत्यंत उत्कृष्ट खेळाचे प्रदर्शन करत ११ वर्षांखालील (Under-11) गटात कांस्य पदक (Bronze Medal) पटकावून शाळेचे व पिंपरी-चिंचवड शहराचे नाव राष्ट्रीय पातळीवर उज्ज्वल केले आहे. या यशस्वी संघात अपूर्वा मोरे (Apurva More), अर्जुन घावळे (Arjun Ghavale) आणि अद्वैत तापकीर (Advait Tapkir) या होतकरू विद्यार्थी-विद्यार्थिनींनी उत्कृष्ट खेळाचे प्रदर्शन करत ही धडाकेबाज कामगिरी केली.

हेही वाचा

भाजपचे ज्येष्ठ नेते भारतरत्न लालकृष्ण अडवाणी रुग्णालयात दाखल; छातीत संसर्ग, प्रकृती स्थिर

देशभरातून विविध राज्यांतील नामवंत व मातब्बर खेळाडू या स्पर्धेत सहभागी झाले होते. अत्यंत चुरशीच्या ठरलेल्या या स्पर्धेत आरकेएलच्या विद्यार्थ्यांनी अंडर-११, अंडर-१४ आणि अंडर-१७ या वयोगटांमध्ये सहभाग नोंदवत आपल्या उत्कृष्ट कौशल्याच्या, चपळतेच्या आणि शिस्तीच्या जोरावर बाजी मारली. चिमुकल्या खेळाडूंनी राष्ट्रीय स्तरावर दाखवलेल्या या चमकदार कामगिरीबद्दल क्रीडा क्षेत्रातून व पालकांकडून त्यांच्यावर कौतुकाचा वर्षाव होत आहे.

शाळेकडून विजयी खेळाडूंचा विशेष सत्कार

​राष्ट्रीय स्तरावर कांस्य पदक पटकावून शाळेचा गौरव वाढविणाऱ्या अपूर्वा मोरे, अर्जुन घावळे, अद्वैत तापकीर या सर्व विजयी खेळाडूंचा आणि त्यांना मोलाचे मार्गदर्शन करणाऱ्या क्रीडा शिक्षकांचा आरकेएल गॅलक्सी इंटरनॅशनल स्कूलच्या व्यवस्थापनातर्फे विशेष सत्कार करण्यात आला व पुढील उज्ज्वल भविष्यासाठी शुभेच्छा देण्यात आल्या.

​आमच्या शाळेच्या विद्यार्थ्यांनी राष्ट्रीय गतका स्पर्धेत मिळवलेले यश आणि पटकावलेले कांस्य पदक अत्यंत अभिमानास्पद आहे. अपूर्वा मोरे, अर्जुन घावळे आणि अद्वैत तापकीर या विद्यार्थ्यांनी दाखवलेली जिद्द, कठोर परिश्रम आणि खेळावरील निष्ठा यामुळेच ही उज्ज्वल कामगिरी शक्य झाली आहे. शाळा नेहमीच विद्यार्थ्यांना शैक्षणिक विकासासोबतच क्रीडा क्षेत्रात पुढे जाण्यासाठी प्रोत्साहन देते. या यशात खेळाडूंसोबतच त्यांच्या मार्गदर्शक शिक्षकांचे आणि पालकांचेही मोठे योगदान आहे. विजयी खेळाडूंना पुढील उज्ज्वल भविष्यासाठी आणि क्रीडा प्रवासासाठी माझ्याकडून मनःपूर्वक शुभेच्छा!

– डॉ. पुष्कर चोबे, सीईओ, आरकेएल गॅलक्सी इंटरनॅशनल स्कूल. 

महाईन्यूज-X वर फॉलो करा : महाईन्यूजला instagram वर फॉलो करा