अर्शदीप सिंग दुखापतग्रस्त; ‘स्विंग किंग’ भुवनेश्वर कुमारचे ४ वर्षांनंतर टीम इंडियात पुनरागमन!
Bhuvneshwar Kumar | भारत आणि वेस्ट इंडिज यांच्यातील पाचव्या आणि निर्णायक टी-२० सामन्यापूर्वी भारतीय संघात महत्त्वाचा बदल करण्यात आला आहे. हैदराबाद येथे झालेल्या चौथ्या टी-२० सामन्यात फलंदाजी करताना युवा वेगवान गोलंदाज अर्शदीप सिंगच्या खांद्याला दुखापत झाली. या दुखापतीमुळे तो निर्णायक लढतीला मुकण्याची शक्यता निर्माण झाल्याने, बीसीसीआयने अनुभवी वेगवान गोलंदाज आणि ‘स्विंगचा किंग’ म्हणून ओळखल्या जाणाऱ्या भुवनेश्वर कुमारचा बदली खेळाडू म्हणून तातडीने संघात समावेश केला आहे. वयाच्या ३६व्या वर्षी तब्बल चार वर्षांनंतर भुवनेश्वर भारतीय संघात पुनरागमन करत आहे.
भुवनेश्वर कुमारने भारतासाठी अखेरचा आंतरराष्ट्रीय सामना नोव्हेंबर २०२२ मध्ये न्यूझीलंडविरुद्ध खेळला होता. त्यानंतर तो प्रदीर्घ काळ राष्ट्रीय संघाबाहेर होता. आगामी न्यूझीलंड दौऱ्यासाठी (२२ ऑक्टोबरपासून सुरू होणाऱ्या टी-२० मालिकेसाठी) त्याची आधीच निवड झाली होती; मात्र अर्शदीपच्या दुखापतीमुळे त्याला वेस्ट इंडिजविरुद्धच्या निर्णायक सामन्यासाठी आधीच पाचारण करण्यात आले आहे. आयपीएलच्या मागील दोन हंगामात भुवनेश्वरने आपल्या भेदक माऱ्याने ४५ बळी टिपत उत्कृष्ट कामगिरी केली होती. टी-२० फॉरमॅटमध्ये सर्वाधिक बळी मिळवणारा भारतीय वेगवान गोलंदाज म्हणून त्याचा दांडगा अनुभव आता भारतीय संघाच्या कामी येणार आहे.
हेही वाचा
रस्त्यावर धावणार अन् हवेतही उडणार; टेस्ला ‘Roadster 2’ चे हवेत थरारक उड्डाण, व्हिडिओ व्हायरल
बीसीसीआयचे सचिव देवजित सैकिया यांनी प्रसिद्धीपत्रकात माहिती दिली की, “बुधवारी हैदराबाद येथे झालेल्या चौथ्या सामन्यादरम्यान अर्शदीप सिंगच्या गोलंदाजी करणाऱ्या खांद्याला दुखापत झाली. त्यामुळे खबरदारीचा उपाय म्हणून भुवनेश्वर कुमारचा संघात समावेश करण्यात आला आहे. अर्शदीपच्या दुखापतीच्या प्रगतीचा आढावा घेऊन तो पाचव्या सामन्यात खेळणार की नाही, याचा अंतिम निर्णय सामन्यापूर्वी घेतला जाईल.”
वेस्ट इंडिजविरुद्ध पाचव्या टी-२० सामन्यासाठी भारताचा सुधारित संघ
श्रेयस अय्यर (कर्णधार), तिलक वर्मा (उपकर्णधार), अभिषेक शर्मा, वैभव सूर्यवंशी, ईशान किशन (यष्टीरक्षक), संजू सॅमसन (यष्टीरक्षक), शिवम दुबे, कुलदीप यादव, अक्षर पटेल, रवी बिश्नोई, नितीश कुमार रेड्डी, भुवनेश्वर कुमार, अर्शदीप सिंग, प्रिन्स यादव, मयंक यादव आणि नमन धीर.
महाईन्यूज-X वर फॉलो करा : महाईन्यूजला instagram वर फॉलो करा
