श्रीवर्धनकरांसाठी पाणी नियोजनाला गती; रानवली धरणातील ४५ टक्के साठ्याच्या काटकसरीने वापराचे निर्देश

मुंबई : श्रीवर्धन शहरासह रानवली धरणावर अवलंबून असलेल्या ग्रामीण भागातील गावांना पुढील पावसाळ्यापर्यंत पुरेसा पाणीपुरवठा उपलब्ध व्हावा, यासाठी उपलब्ध पाणीसाठ्याचा काटकसरीने वापर करून नियोजनबद्ध व्यवस्थापन करावे, असे निर्देश महिला व बालविकास मंत्री आदिती तटकरे यांनी दिले. संभाव्य दुष्काळसदृश परिस्थिती लक्षात घेऊन पाणीपुरवठा व्यवस्थेतील त्रुटी दूर करण्यासह पाण्याचा अपव्यय रोखण्यासाठी तातडीने उपाययोजना करण्यावर त्यांनी भर दिला.

श्रीवर्धन शहराच्या पाणीपुरवठा योजनेचा आणि रानवली धरणातील उपलब्ध पाणीसाठ्याचा आढावा घेण्यासाठी मंत्रालयात मंत्री आदिती तटकरे यांच्या अध्यक्षतेखाली बैठक झाली. या बैठकीत रायगडचे जिल्हाधिकारी आणि जिल्हा परिषदेचे मुख्य कार्यकारी अधिकारी दूरदृश्य प्रणालीद्वारे सहभागी झाले होते. जलसंपदा विभाग, ग्रामीण पाणीपुरवठा विभाग आणि संबंधित यंत्रणांचे अधिकारीही उपस्थित होते.

रानवली धरणात ४५ टक्के पाणीसाठा

रानवली धरणातील पाणीसाठा सध्या ४५ टक्के असल्याने उपलब्ध पाण्याचा जपून वापर करणे आवश्यक आहे. श्रीवर्धन शहरासह धरणावर अवलंबून असलेल्या ग्रामीण भागातील गावांची पाण्याची गरज लक्षात घेऊन उपलब्ध साठ्याचे काटेकोर नियोजन करावे, असे तटकरे यांनी सांगितले.

संभाव्य दुष्काळसदृश परिस्थितीत नागरिकांना पिण्याच्या पाण्याची टंचाई जाणवू नये, यासाठी पाण्याची उपलब्धता आणि अपेक्षित मागणी यांचा विचार करून पाणीवापराचे व्यवस्थापन करण्याच्या सूचनाही त्यांनी दिल्या.

हेही वाचा –  महाराष्ट्रात आरोग्य क्षेत्रात नवोन्मेषाची नवी दिशा; ‘लिव्हिंग लॅब’मधून गुणवत्ता सुधारणा आणि रोजगारनिर्मितीवर भर

पाइपलाइनची गळती रोखण्यावर भर

पाणीपुरवठा करणाऱ्या पाइपलाइनची तातडीने पाहणी करून गळती आढळणाऱ्या ठिकाणांची दुरुस्ती करावी. धरणातील पाण्याची गळती रोखण्यासोबतच बाष्पीभवनामुळे होणारे नुकसान कमी करण्यासाठीही व्यवहार्य उपाययोजना कराव्यात, असे निर्देश मंत्री तटकरे यांनी दिले.

उपलब्ध पाणीसाठा अधिक काळ टिकवून ठेवण्यासाठी धरणातील गाळ काढण्याच्या कामाला प्राधान्य देण्याची सूचनाही त्यांनी केली. पाणीपुरवठा व्यवस्थेतील त्रुटी दूर करण्यासाठी संबंधित विभागांनी समन्वयाने काम करावे, असेही त्यांनी स्पष्ट केले.

ग्रामपंचायत आणि नगरपरिषदेने समन्वय साधावा

पाणीटंचाईची संभाव्य परिस्थिती लक्षात घेऊन संबंधित ग्रामपंचायती आणि श्रीवर्धन नगरपरिषदेने परस्पर समन्वयाने कार्यवाही करावी. ग्रामसभा आणि स्थानिक बैठकांच्या माध्यमातून नागरिकांमध्ये पाणी बचतीबाबत जनजागृती करावी, असे आवाहन करण्यात आले.

पाण्याचा काटकसरीने वापर, गळती रोखणे आणि उपलब्ध साठ्याचे प्रभावी व्यवस्थापन यासाठी आवश्यक उपाययोजनांचा आराखडा तयार करून त्याची तातडीने अंमलबजावणी करण्याचे निर्देशही मंत्री आदिती तटकरे यांनी दिले.

या उपाययोजनांमुळे श्रीवर्धन शहर आणि रानवली धरणावर अवलंबून असलेल्या ग्रामीण गावांचा पाणीपुरवठा नियोजनबद्ध पद्धतीने सुरू ठेवण्यास मदत होण्याची अपेक्षा आहे.

महाईन्यूज-X वर फॉलो करा : महाईन्यूजला instagram वर फॉलो करा