आदित्य आणि अमित ठाकरे यांच्याविरोधात गुन्हा दाखल; ३०० हून अधिक आंदोलकांवरही कारवाई

मुंबई : शिवसेना (उद्धव बाळासाहेब ठाकरे) पक्षाचे नेते आदित्य ठाकरे आणि महाराष्ट्र नवनिर्माण सेनेचे नेते अमित ठाकरे यांच्याविरोधात मुंबईतील शिवाजी पार्क पोलीस ठाण्यात गुन्हा दाखल करण्यात आला आहे. बेकायदेशीर जमाव जमवणे, परवानगीशिवाय आंदोलन करणे आणि सरकारी कामात अडथळा आणल्याचा आरोप त्यांच्यावर ठेवण्यात आला आहे. या प्रकरणात ठाकरे बंधूंसह विविध राजकीय पक्षांचे नेते, पदाधिकारी आणि ३०० हून अधिक आंदोलकांविरोधातही गुन्हा नोंदवण्यात आल्याची माहिती आहे.

ठाकरे बंधूंसह अनेक नेत्यांचा समावेश

या प्रकरणात आदित्य ठाकरे आणि अमित ठाकरे यांच्यासह अनिल परब, महेश सावंत, वरुण सरदेसाई, नितीन सरदेसाई, संदीप देशपांडे, यशवंत किल्लेदार आणि सुनील प्रभू यांची नावे समोर आली आहेत. याशिवाय शिवसेना आणि मनसेच्या काही पदाधिकाऱ्यांचाही गुन्हा दाखल झालेल्यांमध्ये समावेश असल्याचे सांगण्यात येत आहे.

हेही वाचा –  होर्मुझच्या सामुद्रधुनीत दोन व्यापारी जहाजांवर हल्ले; दोन भारतीय खलाशी बेपत्ता

पोलिस व्हॅन अडवल्याचा आरोप

आंदोलकांनी भरलेली पोलिस व्हॅन अडवून आदित्य ठाकरे आणि अमित ठाकरे यांनी सरकारी कामात अडथळा निर्माण केल्याचा आरोप पोलिसांकडून करण्यात आला आहे. या घटनेच्या पार्श्वभूमीवर संबंधित नेते आणि आंदोलकांविरोधात गुन्हा नोंदवण्यात आला आहे.

या प्रकरणात ३०० हून अधिक आंदोलकांवरही मुंबई पोलिसांनी कारवाई केली आहे. आंदोलनादरम्यान नेमकी कोणती परिस्थिती निर्माण झाली आणि संबंधितांवरील आरोपांबाबत पुढील तपासात काय निष्पन्न होते, याकडे लक्ष लागले आहे.

दरम्यान, गुन्हा दाखल होणे म्हणजे आरोप सिद्ध होणे नव्हे. या प्रकरणातील पुढील पोलिस तपास आणि कायदेशीर प्रक्रियेनंतरच आरोपांबाबतचे चित्र स्पष्ट होईल.

महाईन्यूज-X वर फॉलो करा : महाईन्यूजला instagram वर फॉलो करा