भारतीय महिला हॉकी संघाचा ऐतिहासिक विजय; 44 वर्षांनंतर आशियाई क्रीडा स्पर्धेत सुवर्ण

मुंबई : भारतीय महिला हॉकी संघाने 2026 च्या आशियाई क्रीडा स्पर्धेत ऐतिहासिक कामगिरी करत सुवर्णपदकावर नाव कोरले आहे. जपानमध्ये झालेल्या अंतिम सामन्यात भारताने गतविजेत्या चीनचा 1-0 असा पराभव केला. या विजयासह भारतीय महिला हॉकी संघाने तब्बल 44 वर्षांनंतर आशियाई क्रीडा स्पर्धेतील सुवर्णपदक पटकावले. तसेच या विजयामुळे भारताला लॉस एंजेलिस 2028 ऑलिम्पिकचे थेट पात्रता स्थान मिळाले आहे.

भारताने यापूर्वी 1982 मध्ये महिला हॉकीचे सुवर्णपदक जिंकले होते. त्यानंतर 1998 आणि 2018 मध्ये भारतीय संघ अंतिम फेरीत पोहोचला होता; मात्र दोन्ही वेळा सुवर्णपदक हुकले. अखेर 44 वर्षांच्या प्रतीक्षेनंतर भारताने पुन्हा आशियाई क्रीडा स्पर्धेत महिला हॉकीचे सुवर्णपदक जिंकले.

लालरेमसियामीचा निर्णायक गोल

अंतिम सामन्यात चीनने सुरुवातीपासून आक्रमक खेळ करत भारतीय बचावावर दबाव निर्माण केला. मात्र भारताने संयमी खेळ करत योग्य संधीची प्रतीक्षा केली. सामन्याच्या 10व्या मिनिटाला लालरेमसियामीने रिव्हर्स-स्टिक फटका मारत शानदार गोल केला आणि भारताला 1-0 अशी आघाडी मिळवून दिली. हा गोल अखेर भारताच्या विजयासाठी निर्णायक ठरला. विशेष म्हणजे, लालरेमसियामीचा हा 200वा आंतरराष्ट्रीय सामना होता.

आघाडी घेतल्यानंतर चीनने गोल करण्यासाठी सातत्याने हल्ले चढवले. मात्र भारतीय बचावफळीने चीनच्या आक्रमणाला प्रभावीपणे रोखले. चीनला पेनल्टी स्ट्रोकची संधी मिळाल्यानंतर भारताच्या अनुभवी गोलरक्षक सविता पुनियाने अप्रतिम बचाव करत गोल रोखला. तिच्या या बचावामुळे भारताची आघाडी कायम राहिली.

हेही वाचा –  सिप्ला फार्माच्या पुण्यातील गोदामाचे औषध विक्री परवाने रद्द; FDAची मोठी कारवाई

भारतीय बचावाची भक्कम भिंत

दुसऱ्या सत्रापासून चीनने अधिक आक्रमक खेळ करत भारतीय गोलक्षेत्रात वारंवार प्रवेश केला. मात्र सविता पुनियासह भारतीय बचावपटूंनी प्रत्येक हल्ला परतवून लावला. चीनकडून सातत्याने प्रयत्न झाले, परंतु भारतीय बचाव भेदण्यात त्यांना यश आले नाही.

सामन्याच्या अखेरच्या क्षणांपर्यंत भारताने आपली 1-0 अशी आघाडी कायम ठेवली आणि अखेर विजय मिळवत सुवर्णपदकावर कब्जा केला.

ऑलिम्पिकचे तिकीटही निश्चित

आशियाई क्रीडा स्पर्धेतील या सुवर्णपदकामुळे भारतीय महिला हॉकी संघाने 2028 लॉस एंजेलिस ऑलिम्पिकसाठी थेट पात्रता मिळवली आहे. 2026 आशियाई क्रीडा स्पर्धेतील महिला हॉकीमधील पात्र ठरणाऱ्या सर्वोच्च संघाला ऑलिम्पिक कोटा मिळणार होता. भारताने सुवर्णपदक जिंकत हा कोटा निश्चित केला.

भारताच्या महिला हॉकी संघासाठी हा विजय केवळ सुवर्णपदकाचा नाही, तर चार दशकांहून अधिक काळाच्या प्रतीक्षेला पूर्णविराम देणारा ठरला आहे. लालरेमसियामीचा निर्णायक गोल, सविता पुनियाचा अप्रतिम बचाव आणि संपूर्ण संघाच्या भक्कम बचावाच्या जोरावर भारताने आशियाई हॉकीच्या इतिहासात पुन्हा सुवर्णाक्षरांनी आपले नाव नोंदवले.

महाईन्यूज-X वर फॉलो करा : महाईन्यूजला instagram वर फॉलो करा