दुष्काळी परिस्थितीवरील मंत्रिमंडळ उपसमितीत नितेश राणेंचा समावेश; मच्छिमारांच्या प्रश्नांकडेही लक्ष

मुंबई : राज्यातील अपुऱ्या पावसामुळे निर्माण झालेल्या दुष्काळजन्य परिस्थितीचा वेळोवेळी आढावा घेऊन आवश्यक उपाययोजना सुचविणे आणि परिस्थितीचे संनियंत्रण करण्यासाठी स्थापन करण्यात आलेल्या मंत्रिमंडळ उपसमितीत मत्स्यव्यवसाय व बंदरे विकास मंत्री नितेश राणे यांचा सदस्य म्हणून समावेश करण्यात आला आहे. आपत्ती व्यवस्थापन, मदत व पुनर्वसन विभागाने २९ सप्टेंबर २०२६ रोजी शासन निर्णय जारी करून याबाबत माहिती दिली आहे.

महसूलमंत्र्यांच्या अध्यक्षतेखाली गठित करण्यात आलेल्या ११ सदस्यीय मंत्रिमंडळ उपसमितीत नितेश राणे यांचा समावेश करण्याचा निर्णय २९ सप्टेंबर रोजी झालेल्या मंत्रिमंडळ बैठकीत घेण्यात आला. त्यामुळे दुष्काळजन्य परिस्थितीच्या आढाव्यात आता मत्स्यव्यवसायाशी संबंधित बाबींचाही विचार केला जाणार आहे.

राज्यात अपुऱ्या पावसामुळे निर्माण झालेल्या परिस्थितीचा नियमित आढावा घेणे, आवश्यक उपाययोजना सुचविणे आणि परिस्थितीवर नियंत्रण ठेवण्यासाठी ही उपसमिती काम करणार आहे. या पार्श्वभूमीवर मत्स्यव्यवसाय व बंदरे विकास मंत्री म्हणून नितेश राणे यांचा समितीत समावेश करण्यात आला आहे.

हेही वाचा –  कामगारांचे हक्क आणि थकीत देणी तातडीने द्या; सचिन अहिर, आशिष जयस्वाल यांचे निर्देश

मच्छिमारांच्या प्रश्नांवरही होणार विचार

मत्स्यव्यवसायाला शेतीचा दर्जा देण्यात आलेला असल्याने दुष्काळी परिस्थितीचा परिणाम होणाऱ्या मच्छिमार आणि मत्स्य उत्पादकांच्या प्रश्नांकडेही या समितीच्या माध्यमातून लक्ष दिले जाणार आहे. पाणीसाठ्यातील घट, मत्स्य उत्पादनावर होणारा परिणाम आणि संबंधित घटकांना आवश्यक असलेल्या मदतीबाबतच्या बाबींचा आढावा घेण्यास यामुळे वाव मिळणार आहे.

दुष्काळाच्या पार्श्वभूमीवर मच्छिमार, मत्स्य उत्पादक आणि मत्स्यव्यवसायाशी संबंधित घटकांसाठी आवश्यक मदत व उपाययोजनांबाबतच्या निर्णयप्रक्रियेत मंत्री नितेश राणे यांचा सहभाग राहणार आहे. त्यामुळे दुष्काळ निवारणाच्या उपाययोजनांमध्ये कृषी क्षेत्रासोबतच मत्स्यव्यवसायाशी संबंधित बाबींचाही विचार होण्याचा मार्ग मोकळा झाला आहे.

महाईन्यूज-X वर फॉलो करा : महाईन्यूजला instagram वर फॉलो करा