अमरावती शिक्षक मतदारसंघातून काँग्रेसकडून अदिती पोहरे मैदानात

मुंबई : महाराष्ट्र विधान परिषदेच्या शिक्षक आणि पदवीधर मतदारसंघांच्या निवडणुकीची घोषणा झाल्यानंतर राजकीय पक्षांकडून उमेदवार निश्चित करण्याच्या हालचालींना वेग आला आहे. याच पार्श्वभूमीवर अमरावती विभाग शिक्षक मतदारसंघातून काँग्रेसने प्रा. अदिती ऋषिकेश पोहरे यांना उमेदवारी दिल्याचे जाहीर केले आहे. अदिती पोहरे यांनी मुंबईतील टिळक भवन येथे काँग्रेसमध्ये प्रवेश केला. यावेळी काँग्रेसचे महाराष्ट्र प्रभारी डॉ. सिरिवेल्ला प्रसाद, प्रदेशाध्यक्ष हर्षवर्धन सपकाळ आणि ज्येष्ठ नेत्या यशोमती ठाकूर उपस्थित होत्या. अदिती पोहरे यांच्या उमेदवारीची घोषणा यशोमती ठाकूर यांनी केल्याचे वृत्त आहे.

अमरावती विभाग शिक्षक मतदारसंघात अमरावती, अकोला, बुलढाणा, वाशिम आणि यवतमाळ या पाच जिल्ह्यांचा समावेश आहे. या मतदारसंघात काँग्रेसकडून अदिती पोहरे यांच्या नावाची चर्चा आधीपासून सुरू होती. आता त्यांच्या उमेदवारीनंतर निवडणुकीतील राजकीय समीकरणांना वेग आला आहे.

कोण आहेत अदिती पोहरे?

अदिती पोहरे या अभियांत्रिकी शिक्षण क्षेत्रातील प्राध्यापक म्हणून कार्यरत राहिल्या आहेत. त्यांचे शिक्षण बी.ई. (सिव्हिल इंजिनिअरिंग), एम.ई. (स्ट्रक्चरल डिझाईन) आणि एम.ए. (मानसशास्त्र) असे झाले आहे. शासकीय अभियांत्रिकी महाविद्यालयात अध्यापनाचा त्यांना अनुभव असल्याची माहिती देण्यात आली आहे.

अदिती पोहरे यांचे कौटुंबिक पार्श्वभूमीही विदर्भातील शिक्षण आणि राजकारणाशी जोडलेली आहे. त्या श्री शिवाजी शिक्षण संस्थेशी संबंधित देशमुख कुटुंबातील आहेत. त्यांचे सासरे प्रकाश पोहरे हे ‘देशोन्नती’चे संस्थापक-संपादक असल्याचे नमूद केले जाते. त्यामुळे अमरावती विभागातील शिक्षण क्षेत्राशी संबंधित त्यांचा संपर्क हा निवडणुकीतील महत्त्वाचा घटक ठरू शकतो, अशी चर्चा आहे.

हेही वाचा –  विरोधकांच्या आरोपांना उत्तर देण्यासाठी भाजपची रणनीती; नेत्यांवर विभागनिहाय जबाबदारी

महायुतीचा जागावाटपाचा पेच कायम

दुसरीकडे, महायुतीच्या जागावाटपाबाबतही चर्चा सुरू आहे. माध्यमांतील वृत्तांनुसार छत्रपती संभाजीनगर पदवीधर मतदारसंघ अजित पवार गटाकडे, अमरावती शिक्षक मतदारसंघ शिंदे गटाकडे, तर नागपूर आणि पुणे पदवीधर मतदारसंघ भाजपकडे जाण्याचे संभाव्य समीकरण चर्चेत आहे. मात्र पुणे शिक्षक मतदारसंघाबाबत भाजप आणि शिवसेना शिंदे गटामध्ये दावेदारी असल्याचे वृत्त आहे. त्यामुळे महायुतीतील अंतिम जागावाटपाकडे लक्ष लागले आहे.

२३ ऑक्टोबरला मतदान

महाराष्ट्र विधान परिषदेच्या तीन पदवीधर आणि दोन शिक्षक मतदारसंघांसाठी निवडणूक होणार आहे. निवडणूक आयोगाच्या कार्यक्रमानुसार २९ सप्टेंबरला अधिसूचना जारी झाली असून ६ ऑक्टोबरपर्यंत उमेदवारी अर्ज दाखल करता येणार आहेत. ७ ऑक्टोबरला अर्जांची छाननी, ९ ऑक्टोबरला अर्ज मागे घेण्याची अंतिम मुदत आहे.

२३ ऑक्टोबर २०२६ रोजी सकाळी ८ ते दुपारी ४ या वेळेत मतदान होणार असून २७ ऑक्टोबरला मतमोजणी होणार आहे.

या निवडणुकीत छत्रपती संभाजीनगर, पुणे आणि नागपूर पदवीधर तसेच अमरावती आणि पुणे शिक्षक मतदारसंघांचा समावेश आहे.

महाईन्यूज-X वर फॉलो करा : महाईन्यूजला instagram वर फॉलो करा