Ladki Bahin Yojana: लाडक्या बहिणींनो सावधान! ‘रखडलेला हप्ता मिळवा’ म्हणत येणाऱ्या लिंकवर क्लिक करू नका; सरकारचा खुलासा

मुंबई : मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची बातमी आहे. ऑगस्ट महिन्याचा हप्ता मिळवण्यासाठी पुन्हा अर्ज करा, तसेच रखडलेले हप्ते मिळवण्यासाठी दिलेल्या लिंकवर क्लिक करा, असा संदेश सोशल मीडियावर मोठ्या प्रमाणात व्हायरल होत आहे. मात्र, लाडकी बहीण योजनेसाठी नवीन नोंदणी सुरू झाल्याचा किंवा e-KYC पुन्हा सुरू केल्याचा हा दावा अधिकृत नसल्याचे स्पष्ट करण्यात आले आहे.

व्हायरल संदेशांमध्ये e-KYC अपूर्ण राहिलेल्या किंवा हप्ते बंद झालेल्या महिलांनी पुन्हा अर्ज करण्याचे आवाहन केले जात आहे. त्यासाठी आधार कार्ड, रेशन कार्ड, रहिवासी प्रमाणपत्र, बँक खात्याची माहिती आणि फोटो यांसारखी वैयक्तिक कागदपत्रे मागितली जात असल्याचेही सांगितले जात आहे. त्यामुळे अशा अनधिकृत लिंकवर माहिती भरल्यास वैयक्तिक किंवा बँकिंग माहितीचा गैरवापर होण्याचा धोका निर्माण होऊ शकतो.

नवीन नोंदणी सध्या बंद

लाडकी बहीण योजनेसाठी नवीन नोंदणी प्रक्रिया सध्या बंद असल्याची माहिती समोर आली आहे. तसेच e-KYC पुन्हा सुरू झाल्याबाबत सोशल मीडियावर फिरणारा दावा अधिकृत नसल्याचे स्पष्ट करण्यात आले आहे. त्यामुळे ‘लिंकवर क्लिक करा आणि रखडलेला हप्ता मिळवा’ अशा संदेशांवर थेट विश्वास न ठेवण्याचे आवाहन करण्यात आले आहे.

योजनेशी संबंधित अधिकृत माहिती तपासण्यासाठी महाराष्ट्र शासनाच्या अधिकृत लाडकी बहीण पोर्टलचा वापर करावा. अधिकृत पोर्टलवर योजनेची माहिती आणि आवश्यक कागदपत्रांची माहिती उपलब्ध आहे.

हेही वाचा –  मोबाईल रिचार्जच्या नियमांत मोठा बदल; 30 दिवसांच्या प्लॅनसह Voice-SMS Only पर्यायांना TRAIची मंजुरी

ऑगस्टच्या हप्त्यासाठी ३३९ कोटी १४ लाखांचा निधी

दरम्यान, पात्र लाभार्थी महिलांना ऑगस्ट २०२६चा आर्थिक लाभ देण्यासाठी ३३९ कोटी १४ लाख रुपयांच्या निधीला मंजुरी देण्यात आली आहे. हा निधी सामाजिक न्याय व विशेष सहाय्य विभागाकडून महिला व बालविकास विभागाकडे वर्ग करण्यास मान्यता देण्यात आली आहे. हा निधी विशेषतः योजनेच्या अनुसूचित जाती घटकातील पात्र लाभार्थी महिलांसाठी उपलब्ध करण्यात आला आहे.

२०२६-२७ या आर्थिक वर्षात या घटकासाठी ३ हजार कोटी रुपयांची तरतूद करण्यात आली असून, त्यातून ऑगस्ट महिन्याच्या लाभासाठी ३३९ कोटी १४ लाख रुपये उपलब्ध करून देण्यात आले आहेत. पात्र लाभार्थींना योजनेनुसार १,५०० रुपयांचा लाभ DBTद्वारे देण्याची प्रक्रिया करण्यात येत आहे.

आधार-बँक खात्याची माहिती अनोळखी लिंकवर देऊ नका

लाडकी बहीण योजनेच्या नावाने सोशल मीडियावर येणाऱ्या कोणत्याही संदेशाची अधिकृतता तपासणे महत्त्वाचे आहे. नवीन अर्ज, e-KYC, हप्ता किंवा निधी वितरणाबाबत माहिती मिळाल्यास ती महाराष्ट्र शासनाच्या अधिकृत यंत्रणेकडून प्रसिद्ध झाली आहे का, हे तपासा.

अनोळखी वेबसाइट किंवा लिंकवर क्लिक करून आधार क्रमांक, बँक खाते, OTP किंवा इतर वैयक्तिक माहिती देऊ नये. योजनेशी संबंधित अधिकृत अपडेटसाठी शासनाच्या अधिकृत पोर्टलवरच विश्वास ठेवावा.

महाईन्यूज-X वर फॉलो करा : महाईन्यूजला instagram वर फॉलो करा