Asian Games: भारतीय महिला संघाचा अंतिम सामना कोणाविरुद्ध आणि किती वाजता? जाणून घ्या..
Asian Games 2026 | आशियाई क्रीडा स्पर्धा २०२६ मध्ये भारतीय महिला क्रिकेट संघाने उपांत्य फेरीत बांगलादेशचा ११४ धावांच्या प्रचंड फरकाने धुव्वा उडवत दिमाखात अंतिम फेरीत (फायनल) धडक मारली आहे. सलामीवीर शफाली वर्माच्या झंझावाती नाबाद शतकाच्या बळावर भारताने २० षटकांत ४ बाद १९५ धावांचा डोंगर उभा केला होता. प्रत्युत्तरात विजयासाठी १९६ धावांचे आव्हान घेऊन उतरलेला बांगलादेशचा डाव भारतीय गोलंदाजीच्या माऱ्यापुढे अवघ्या १५.४ षटकांत ८१ धावांवर गारद झाला.
नाणेफेक जिंकून प्रथम फलंदाजी करताना स्मृती मानधना आणि शफाली वर्मा यांनी पहिल्या विकेटसाठी ७६ धावांची आक्रमक सलामी दिली. शफाली वर्माने अवघ्या ४९ चेंडूंमध्ये ३ चौकार आणि तब्बल ९ गगनचुंबी षटकारांच्या जोरावर आपले नाबाद शतक (१०० धावा) पूर्ण केले. व्हाईट-बॉल क्रिकेटमधील हे तिचे पहिलेच शतक ठरले असून, आशियाई क्रीडा स्पर्धेत शतक ठोकण्याचा ऐतिहासिक विक्रम तिने आपल्या नावावर नोंदवला आहे. याव्यतिरिक्त स्मृती मानधनाने १९ चेंडूंत ३७, तर कर्णधार हरमनप्रीत कौरने ३३ चेंडूंत ४० धावांचे मोलाचे योगदान दिले.
हेही वाचा
‘आत्महत्येला नकार, जीवनाला होकार’चा विद्यार्थ्यांनी केला संकल्प
मोठ्या आव्हानाचा पाठलाग करताना बांगलादेशची सुरुवात अत्यंत निराशाजनक झाली. सलामीवीर जुएरिया फिरदौस पहिल्याच चेंडूवर ‘गोल्डन डक’ची शिकार झाली. दिलारा अख्तर (२७ धावा), सुलताना खातून (१२ धावा) आणि शर्मिन अख्तर (१० धावा) यांचा अपवाद वगळता बांगलादेशच्या एकाही फलंदाजाला दुहेरी आकडा गाठता आला नाही. भारताकडून नंदिनी शर्मा आणि दीप्ती शर्मा यांनी अचूक मारा करत प्रत्येकी ३ बळी घेत बांगलादेशला अवघ्या ८१ धावांत रोखले.
सुवर्णपदकासाठी भारत विरुद्ध श्रीलंका महामुकाबला
पहिल्या उपांत्य सामन्यात पाकिस्तानचा ८ गडी राखून धुव्वा उडवत श्रीलंकेने आधीच अंतिम फेरीत स्थान मिळवले आहे. त्यामुळे आता सुवर्णपदकासाठी भारत आणि श्रीलंका यांच्यात २२ सप्टेंबर रोजी सकाळी १०:३० वाजता अंतिम सामना रंगणार आहे. या लढतीतील विजेता संघ सुवर्णपदकावर नाव कोरेल, तर पराभूत संघाला रौप्यपदक मिळेल. दरम्यान, कांस्यपदकासाठी बांगलादेश आणि पाकिस्तान आमनेसामने येतील.
महाईन्यूज-X वर फॉलो करा : महाईन्यूजला instagram वर फॉलो करा
