४२व्या दिवशीही ‘हनुमान अंश’ची बॉक्स ऑफिसवर हनुमान उडी; २५० कोटींच्या टप्प्याकडे वाटचाल

मुंबई : नीम करोली बाबा यांच्या जीवनावर आधारित भक्तीपट **‘हनुमान अंश’**ची बॉक्स ऑफिसवरील घोडदौड अद्याप सुरू आहे. रिलीजच्या ४२व्या दिवशीही चित्रपटाने चांगली कमाई केल्याचा दावा केला जात आहे. विशेष म्हणजे ‘मिर्झापूर द मूव्ही’ आणि ‘हैवान’सारख्या चित्रपटांची स्पर्धा असतानाही ‘हनुमान अंश’च्या कमाईचा वेग कायम असल्याचे आकडेवारीवरून दिसत आहे.

डॉक्टर विशाल चतुर्वेदी यांच्या दिग्दर्शनाखाली तयार झालेल्या या चित्रपटाने गुरुवारी सहावा आठवडा पूर्ण केला. पाचव्या आठवड्याच्या तुलनेत सहाव्या आठवड्यात चित्रपटाच्या कमाईत ११.०८ टक्क्यांची घट झाली असली, तरी दीर्घकाळ चित्रपटगृहांमध्ये टिकून राहण्यात चित्रपटाला यश मिळाले आहे.

४२व्या दिवशीही कोट्यवधींची कमाई

Sacnilkने दिलेल्या आकडेवारीनुसार, शोभिनव सत्य यांच्या प्रमुख भूमिकेतील ‘हनुमान अंश’ने गुरुवारी ४२व्या दिवशी देशभरातील ९,१६० शोमधून ६.२५ कोटी रुपयांची नेट कमाई केल्याचे सांगितले जाते. चित्रपटाचे एकूण देशांतर्गत नेट कलेक्शन २४३.३८ कोटी रुपये झाल्याचा दावा करण्यात आला आहे.

या वेगाने कमाई सुरू राहिल्यास चित्रपट लवकरच देशांतर्गत बॉक्स ऑफिसवर २५० कोटींचा टप्पा गाठू शकतो, असा अंदाज व्यक्त केला जात आहे. आगामी दिवसांत कमाईचा वेग कायम राहिल्यास ३०० कोटींच्या दिशेनेही चित्रपटाची वाटचाल होऊ शकते.

हेही वाचा –  वाचनाच्या ज्ञानदीपाने उजळला गणेशोत्सव! मोशीतील गायत्री इंग्लिश मीडियम स्कूलचा ‘ग्रंथसंपदा’ उपक्रम

‘मिर्झापूर’ आणि ‘हैवान’शी स्पर्धा

दरम्यान, ‘हनुमान अंश’समोर ‘मिर्झापूर द मूव्ही’ आणि ‘हैवान’ हे चित्रपट प्रदर्शित झाले आहेत. दिलेल्या आकडेवारीनुसार ‘मिर्झापूर द मूव्ही’ला दुसऱ्या आठवड्यात ५४.७५ कोटी रुपयांची नेट कमाई करता आली, तर ‘हैवान’ने पहिल्या आठवड्यात ९.८५ कोटी रुपयांची कमाई केल्याचे सांगितले जाते.

१८ सप्टेंबर रोजी करीना कपूर स्टारर ‘दायरा’ आणि कुणाल खेमूचा ‘वाईब’ हे दोन नवे चित्रपट प्रदर्शित झाले आहेत. त्यामुळे आगामी दिवसांत या नव्या रिलीजचा ‘हनुमान अंश’च्या कमाईवर किती परिणाम होतो, हे पाहणे महत्त्वाचे ठरणार आहे.

महाईन्यूज-X वर फॉलो करा : महाईन्यूजला instagram वर फॉलो करा