गणेश चतुर्थीनिमित्त पंतप्रधान मोदींकडून देशवासीयांना शुभेच्छा; ‘गणपती बाप्पा मोरया!’

नवी दिल्ली : देशभरात गणेशोत्सवाचा उत्साह शिगेला पोहोचला असून, आज घरोघरी लाडक्या गणपती बाप्पाचे आगमन होत आहे. गणेश चतुर्थीनिमित्त पंतप्रधान नरेंद्र मोदी यांनी देशवासीयांना मनःपूर्वक शुभेच्छा दिल्या. भगवान गणेशाच्या आशीर्वादाने प्रत्येकाच्या जीवनात नवी ऊर्जा, उत्साह आणि समृद्धी निर्माण व्हावी तसेच देश निरंतर प्रगतीच्या मार्गावर वाटचाल करावा, अशी प्रार्थना त्यांनी केली.

पंतप्रधान मोदी यांनी ‘एक्स’वरील पोस्टद्वारे गणेशभक्तांना शुभेच्छा दिल्या. ‘विघ्नहर्त्याच्या दर्शनाचा आणि पूजेचा हा पवित्र सण प्रत्येकाच्या जीवनात नवी ऊर्जा आणि नवा उत्साह निर्माण करो. त्यांच्या दैवी आशीर्वादाने सर्व कार्ये यशस्वी होवोत आणि राष्ट्र निरंतर प्रगतीच्या मार्गावर वाटचाल करत राहो,’ अशी भावना त्यांनी व्यक्त केली. पोस्टच्या शेवटी त्यांनी ‘गणपती बाप्पा मोरया!’ असा जयघोषही केला.

यावेळी पंतप्रधानांनी भगवान श्री विनायकाला समर्पित संस्कृत श्लोकही शेअर केला. मोदक प्रिय असलेले, भक्तांना संकटातून मुक्त करणारे आणि संपूर्ण विश्वाचे रक्षण करणारे भगवान गणेश यांना त्यांनी वंदन केले. गणेशाच्या दैवी आशीर्वादाने भक्तांच्या सर्व अडचणी दूर व्हाव्यात, अशी प्रार्थना या श्लोकातून करण्यात आली आहे.

हेही वाचा –  एसटीच्या ताफ्यात पाच हजार नव्या ‘लालपरी’; प्रवाशांना अधिक सुरक्षित, आरामदायी प्रवास

दरम्यान, उत्तर प्रदेशचे मुख्यमंत्री योगी आदित्यनाथ यांनीही गणेश चतुर्थीनिमित्त राज्यातील नागरिक आणि भाविकांना शुभेच्छा दिल्या. गणपती बाप्पाच्या कृपेने सर्व अडथळे दूर होवोत, प्रत्येक संकल्प पूर्ण होवो आणि जीवन सुख, समृद्धी व मांगल्याने भरून जावो, अशी प्रार्थना त्यांनी केली.

गणेश चतुर्थी हा भगवान गणेशाच्या जन्माचा उत्सव म्हणून साजरा केला जातो. महाराष्ट्रासह देशभरात या उत्सवाला मोठे धार्मिक आणि सांस्कृतिक महत्त्व आहे. भाविक घरांमध्ये तसेच सार्वजनिक मंडपांमध्ये गणेशमूर्तींची प्रतिष्ठापना करतात. सजावट, पूजा, आरती आणि विविध सांस्कृतिक कार्यक्रमांनी उत्सवाचा माहोल निर्माण होतो. यंदा १४ सप्टेंबरला गणेश चतुर्थी असून, २५ सप्टेंबरला अनंत चतुर्दशीच्या दिवशी गणेश विसर्जनाने उत्सवाची सांगता होणार आहे.

महाईन्यूज-X वर फॉलो करा : महाईन्यूजला instagram वर फॉलो करा