सप्टेंबरच्या सुरुवातीला महाराष्ट्रात पावसाचा जोर वाढणार; विदर्भ-मराठवाड्याला दिलासा मिळणार?

नागपूर : महाराष्ट्रात यंदा मान्सूनची वाटचाल अपेक्षेप्रमाणे झालेली नसताना आता सप्टेंबरच्या सुरुवातीला राज्यातील काही भागांना पावसाचा दिलासा मिळण्याची शक्यता आहे. ४ आणि ५ सप्टेंबरदरम्यान मध्य महाराष्ट्र, विदर्भ आणि उत्तर मराठवाड्यात पावसाचा जोर वाढण्याचा अंदाज हवामान विभागाकडून वर्तवण्यात आला आहे. मात्र, हा दिलासा अल्पकाळाचा ठरण्याची शक्यता असून १० ते २४ सप्टेंबरदरम्यान महाराष्ट्रात पाऊस सरासरीपेक्षा कमी राहण्याचा अंदाज आहे.

राज्यातील मराठवाडा आणि विदर्भ विभागांमध्ये अद्याप पावसाची मोठी तूट कायम आहे. आतापर्यंत मराठवाड्यात सरासरीपेक्षा २७ टक्के कमी, तर विदर्भात २४ टक्के कमी पाऊस नोंदवण्यात आला आहे. जून आणि जुलै महिन्यांतही पावसाने अपेक्षित साथ न दिल्याने राज्यातील अनेक भागांमध्ये पावसाची तूट निर्माण झाली आहे.

४-५ सप्टेंबरला पावसाचा जोर वाढण्याची शक्यता

बंगालच्या उपसागरात निर्माण होत असलेल्या हवामान प्रणालीचा परिणाम महाराष्ट्राच्या हवामानावर होण्याची शक्यता आहे. त्यामुळे ४ आणि ५ सप्टेंबरदरम्यान मध्य भारतासह विदर्भ आणि उत्तर मराठवाड्यात पावसाचा जोर वाढू शकतो. ऑगस्टमध्ये अपेक्षित पाऊस न झाल्याने शेतकऱ्यांचे लक्ष आता सप्टेंबरमधील या पावसाकडे लागले आहे.

मात्र, १० सप्टेंबरनंतर राज्यातील पावसाचे प्रमाण पुन्हा कमी होण्याची शक्यता असल्याने काही दिवसांचा वाढलेला पाऊस आतापर्यंतची तूट भरून काढण्यासाठी पुरेसा ठरणार का, हा प्रश्न कायम आहे.

हेही वाचा –  इनसाइट २०२६’ मधून विद्यार्थ्यांच्या संशोधनाला राष्ट्रीय व्यासपीठ एमआयटी आळंदीत राष्ट्रीय बहुविषयक ऑनलाइन परिषदेचे यशस्वी आयोजन

पूर्व विदर्भासाठी यलो अलर्ट

दरम्यान, आज पूर्व विदर्भातील काही भागांत मुसळधार पावसाची शक्यता असल्याने हवामान विभागाने यलो अलर्ट जारी केला आहे. हिंगोली, लातूर आणि नांदेड जिल्ह्यांत तुरळक ठिकाणी विजांच्या कडकडाटासह पाऊस पडण्याचा अंदाज आहे. राज्यातील उर्वरित भागात ढगाळ वातावरणासह हलक्या पावसाची शक्यता वर्तवण्यात आली आहे.

बंगालच्या उपसागरातील प्रणालीचा महाराष्ट्रावर परिणाम

पश्चिम बंगाल आणि बांगलादेशच्या किनाऱ्यालगत समुद्रसपाटीपासून सुमारे ७.६ किलोमीटर उंचीवर चक्राकार वाऱ्यांची स्थिती निर्माण झाली आहे. या प्रणालीच्या प्रभावामुळे पश्चिम बंगाल आणि ओडिशाच्या किनारपट्टीलगत कमी दाबाचे क्षेत्र तयार होण्याची शक्यता आहे. या हवामान प्रणालीचा परिणाम पुढील काही दिवसांत मध्य भारतातील हवामानावर होण्याची शक्यता आहे.

२७ ऑगस्ट ते १० सप्टेंबरदरम्यान पूर्व भारतात चांगला पाऊस

२७ ऑगस्ट ते १० सप्टेंबर या कालावधीत पूर्व भारतात चांगला पाऊस होण्याची शक्यता आहे. याच काळात ४-५ सप्टेंबरदरम्यान मध्य भारत, विदर्भ आणि उत्तर मराठवाड्यात पावसाचा जोर वाढण्याची शक्यता आहे.

मात्र, १० सप्टेंबरनंतर महाराष्ट्रात पुन्हा पावसाचे प्रमाण कमी होण्याचा अंदाज आहे. त्यामुळे सप्टेंबरच्या सुरुवातीला होणारा पाऊस राज्यातील एकूण पावसाची तूट कितपत भरून काढतो, याकडे शेतकरी आणि प्रशासनाचे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा