नेपाळमध्ये पुन्हा धोक्याची घंटा! तिबेटकडून वाढला पाण्याचा प्रवाह; बचाव पथकांना सतर्कतेचा इशारा

काठमांडू : तिबेटमधील हिमकडा कोसळून आलेल्या विनाशकारी महापुरानंतर नेपाळमध्ये बचाव आणि शोधमोहीम सुरू असतानाच आता पुन्हा चिंताजनक माहिती समोर आली आहे. पाण्याचा प्रवाह पुन्हा तिबेटच्या दिशेने वाढत असल्याचे वृत्त असून, त्यामुळे नेपाळ सरकारने सुरक्षा कर्मचारी, बचाव पथके तसेच मदतकार्यात सहभागी असलेल्या नागरिकांना तातडीने सतर्क राहण्याचे आवाहन केले आहे.

नेपाळ सरकारने नागरिकांना सुरक्षित ठिकाणी जाण्याच्या सूचना दिल्या आहेत. तसेच आपल्या जवळच्या व्यक्तींना संभाव्य धोक्याची माहिती देऊन त्यांना सुरक्षित स्थळी पोहोचवण्यासाठी मदत करण्याचे आवाहन करण्यात आले आहे. महापुरानंतर चिखल आणि ढिगाऱ्यांमध्ये अडकलेल्या नागरिकांचा शोध घेण्याचे काम सुरू असतानाच नव्या धोक्याची शक्यता निर्माण झाल्याने प्रशासनाची चिंता वाढली आहे.

दरम्यान, रसुवा जिल्ह्यात बुधवारी आलेल्या भोटेकोशी नदीच्या भीषण महापुरामागे एखादा तलाव फुटल्याची शक्यता असल्याची माहिती चीनकडून नेपाळ प्रशासनाला देण्यात आली आहे. मात्र, नेपाळ सरकारने या माहितीला अद्याप अधिकृत दुजोरा दिलेला नाही.

रसुवा जिल्हा प्रशासन कार्यालयाचे सहाय्यक प्रमुख जिल्हा अधिकारी आणि माहिती अधिकारी ध्रुव प्रसाद अधिकारी यांनी सांगितले की, चीनच्या अधिकाऱ्यांकडून तलाव फुटल्याची शक्यता असल्याचा संदेश नेपाळ प्रशासनाला प्राप्त झाला आहे. मात्र, नेपाळच्या बाजूने या माहितीची अद्याप पडताळणी झालेली नाही.

हेही वाचा – मनोज जरांगे पाटील यांचा सरकारला इशारा; २९ ऑगस्टपासून पुन्हा तीव्र आंदोलनाची घोषणा

भोटेकोशी नदीला आलेल्या अचानक महापुरामुळे मोठ्या प्रमाणात जीवित आणि वित्तहानी झाली आहे. अनेक नागरिकांचा मृत्यू झाला असून अनेक जण अद्याप बेपत्ता आहेत. महापुरामागचे नेमके कारण शोधण्यासाठी प्रशासनाकडून तपास सुरू आहे.

चीनकडून मिळालेल्या तलाव फुटण्याच्या माहितीचीही पडताळणी केली जात आहे. त्यामुळे बचावकार्य सुरू असतानाच संभाव्य नव्या पुराच्या धोक्यामुळे सुरक्षा यंत्रणांना अधिक सतर्क राहावे लागत आहे.

महापुरामुळे बाधित भागात बचाव आणि मदतकार्य सुरू आहे. मात्र, पाण्याचा प्रवाह पुन्हा वाढण्याची शक्यता लक्षात घेता बचाव पथकांनीही स्वतःची सुरक्षितता सुनिश्चित करूनच मोहीम राबवावी, असे आवाहन करण्यात आले आहे.

दरम्यान, नेपाळमधील परिस्थितीवर प्रशासनाकडून बारकाईने लक्ष ठेवण्यात येत असून, नागरिकांना अधिकृत सूचनांचे पालन करण्याचे आवाहन करण्यात आले आहे.

महाईन्यूज-X वर फॉलो करा : महाईन्यूजला instagram वर फॉलो करा