३ मोफत LPG सिलिंडर, महिलांना मोफत बस प्रवास; विधानसभेत मुख्यमंत्री विजय यांची मोठी घोषणा!
चेन्नई | तमिळनाडूचे मुख्यमंत्री सी. जोसेफ विजय यांनी सोमवारी राज्य विधानसभेत सर्वसामान्यांसाठी अनेक महत्त्वपूर्ण कल्याणकारी योजनांची घोषणा केली. यामध्ये राज्यातील पात्र कुटुंबांना वर्षाला ३ मोफत स्वयंपाकाचे गॅस सिलिंडर देणे आणि महिलांसह तृतीयपंथीय व्यक्तींसाठी मोफत बस प्रवासाच्या योजनेचा विस्तार करणे या प्रमुख निर्णयांचा समावेश आहे.
अडीच लाख रुपयांपेक्षा कमी वार्षिक उत्पन्न असलेल्या राज्यातील सुमारे १.३० कोटी कुटुंबांना ‘अन्नपूर्णी सुपर सिक्स’ योजनेचा थेट लाभ मिळणार आहे. ही योजना पोंगल २०२७ पासून लागू करण्यात येणार असून, या अंतर्गत पात्र लाभार्थ्यांनी खरेदी केलेल्या तीन गॅस सिलिंडरची रक्कम थेट त्यांच्या बँक खात्यात जमा केली जाईल. या योजनेमुळे राज्याच्या तिजोरीवर दरवर्षी सुमारे ४ हजार कोटी रुपयांचा आर्थिक बोजा पडणार आहे. आखाती प्रदेशातील युद्धजन्य परिस्थितीमुळे निर्माण झालेली गॅस टंचाई आणि वाढत्या महागाईच्या काळात जनतेचा आर्थिक भार हलका करण्यासाठी सरकारने हे पाऊल उचलल्याचे मुख्यमंत्र्यांनी सांगितले.
हेही वाचा
महिला आणि तृतीयपंथीयांसाठी मोफत बस प्रवास विस्तार
यासोबतच, महिलांच्या सक्षमीकरणासाठी आणि त्यांच्या प्रवासाच्या स्वातंत्र्यासाठी ‘वेत्री पयण थिट्टम’ (यशस्वी प्रवास) या मोफत बस प्रवास योजनेची व्याप्ती मोठ्या प्रमाणावर वाढवण्यात आली आहे. येत्या २ ऑक्टोबर रोजी म्हणजेच महात्मा गांधी यांच्या जयंतीदिनी ही विस्तारित योजना लागू केली जाईल. या नव्या बदलानुसार, महिलांना आता केवळ साध्या बसेसच नव्हे, तर एक्सप्रेस, एलएसएस (LSS) आणि डिलक्स बसेसमधूनही मोफत प्रवास करता येणार असून, ही सुविधा आंतर-जिल्हा प्रवासासाठीही लागू असेल. तसेच या योजनेमध्ये आता तृतीयपंथीय व्यक्तींचाही समावेश करण्यात आला आहे. तमिळनाडूच्या कोणत्याही भागातील महिलेला केवळ वाहतूक खर्चामुळे शिक्षणाची किंवा रोजगाराची संधी गमवावी लागू नये, हा सामाजिक न्यायाचा उद्देश डोळ्यासमोर ठेवून हा निर्णय घेतल्याचे मुख्यमंत्री विजय यांनी स्पष्ट केले.
महाईन्यूज-X वर फॉलो करा : महाईन्यूजला instagram वर फॉलो करा
