राष्ट्रीय अंतराळ दिनी PM मोदींचा भारतीय अंतराळ क्षेत्राला सलाम; ‘नव्या युगाची सुरुवात’ म्हणत Gen Z चं कौतुक

नवी दिल्ली : राष्ट्रीय अंतराळ दिनानिमित्त पंतप्रधान नरेंद्र मोदी यांनी देशवासीयांसह शास्त्रज्ञांना शुभेच्छा दिल्या. भारताच्या अंतराळ क्षेत्रातील प्रगतीचे कौतुक करताना त्यांनी हा प्रवास ‘नव्या युगाची सुरुवात’ असल्याचे म्हटले. तसेच देशातील तरुण अभियंते, डिझायनर, कोडर आणि शास्त्रज्ञांकडून विकसित होत असलेल्या नव्या तंत्रज्ञानाचेही त्यांनी कौतुक केले.

दरवर्षी 23 ऑगस्ट रोजी राष्ट्रीय अंतराळ दिन साजरा केला जातो. 23 ऑगस्ट 2023 रोजी चांद्रयान-3 मोहिमेतील विक्रम लँडरने चंद्राच्या दक्षिण ध्रुवीय प्रदेशात यशस्वी सॉफ्ट लँडिंग केले होते. या ऐतिहासिक कामगिरीनंतर भारताने अंतराळ क्षेत्रात नवा इतिहास रचला. याच पार्श्वभूमीवर राष्ट्रीय अंतराळ दिन साजरा केला जातो.

पंतप्रधान मोदी यांनी राष्ट्रीय अंतराळ दिनानिमित्त विशेष संदेश देताना भारताच्या अंतराळ क्षेत्रातील वाढत्या क्षमतेचा उल्लेख केला. 2047 पर्यंत विकसित भारताचे लक्ष्य साध्य करण्यासाठी अंतराळ क्षेत्र महत्त्वपूर्ण भूमिका बजावणार आहे, असे त्यांनी सांगितले. भारत सेमी-क्रायोजेनिक इंजिन आणि इलेक्ट्रिक प्रोपल्शनसारख्या अत्याधुनिक तंत्रज्ञानाच्या क्षेत्रात वेगाने प्रगती करत असल्याचेही त्यांनी नमूद केले.

हेही वाचा –  वारंवार चॉकलेट, चिप्स किंवा गोड पदार्थ खावेसे वाटतात? शरीर देत असू शकते ‘या’ पोषक घटकांची कमतरता

Gen Z च्या तंत्रज्ञानातील योगदानाचे कौतुक

पंतप्रधान मोदी यांनी देशातील Gen Z अर्थात नव्या पिढीतील तरुणांचे विशेष कौतुक केले. आजचे तरुण अभियंते, डिझायनर, कोडर आणि शास्त्रज्ञ प्रणोदन प्रणाली, कंपोझिट मटेरियल्स, रॉकेट स्टेजेस आणि सॅटेलाइट प्लॅटफॉर्मसारख्या अत्याधुनिक क्षेत्रांत काम करत आहेत. काही वर्षांपूर्वी ज्याची कल्पनाही करणे कठीण होते, अशा तंत्रज्ञानावर भारतीय तरुण आज काम करत असल्याचे मोदी यांनी सांगितले.

खासगी अंतराळ क्षेत्राला मिळतेय चालना

भारताचे खासगी अंतराळ क्षेत्र जागतिक गुंतवणूकदारांसाठी आकर्षणाचे केंद्र बनत असल्याचेही पंतप्रधानांनी नमूद केले. भारतीय खासगी कंपन्यांमधील प्रतिभा जागतिक स्तरावर आपली छाप पाडत आहे. इस्रोच्या यशामुळे देशातील अनेक मुलांना अंतराळ विज्ञानाची प्रेरणा मिळत असून, भविष्यातील शास्त्रज्ञांची नवी पिढी तयार होत असल्याचे मोदी यांनी म्हटले.

अमित शाह, जयशंकर यांच्याकडूनही शुभेच्छा

केंद्रीय गृहमंत्री अमित शाह यांनीही राष्ट्रीय अंतराळ दिनानिमित्त इस्रोच्या शास्त्रज्ञांना शुभेच्छा दिल्या. चांद्रयान-3च्या चंद्राच्या दक्षिण ध्रुवावरील यशस्वी लँडिंगमुळे भारताचे अंतराळ क्षेत्रातील मजबूत स्थान जगासमोर आले, असे त्यांनी म्हटले.

परराष्ट्र मंत्री एस. जयशंकर यांनीही राष्ट्रीय अंतराळ दिनाच्या शुभेच्छा देताना ‘आकाशाला मर्यादा नाही’ असा संदेश दिला. तरुण शास्त्रज्ञ, अभियंते आणि उद्योजकांच्या दूरदृष्टी, नाविन्यपूर्ण विचार आणि अथक प्रयत्नांमुळे भारताच्या क्षमतांच्या सीमा विस्तारत असल्याचे जयशंकर यांनी नमूद केले.

महाईन्यूज-X वर फॉलो करा : महाईन्यूजला instagram वर फॉलो करा