‘…तर कायदा व सुव्यवस्थेची गंभीर स्थिती निर्माण होईल’, रिफायनरी विरोधी संघटनेचा इशारा
रत्नागिरी : कोकणात राजापूर येथील रिफायनरीला अनेक राजकीय पक्ष समर्थन करत आहेत. मात्र रिफायनरी विरोधी बारसू सोलगाव पंचक्रोशी संघटनेकडून पुन्हा एकदा आक्रमक पवित्रा घेण्यात आला आहे. ‘एकच जिद्द रिफायनरी रद्द’ आशा घोषणा देत हा विरोध या परिसरात दर्शवण्यात आला आहे. त्यामुळे कोकणात रिफायनरी प्रकल्पाकडे अनेकांचे लक्ष लागले आहे. राज्य सरकार कोणती अधिकृत भूमिका घेणार? हे पाहणे महत्त्वाचे ठरणार आहे. दरम्यान, विरोधी संघटना पदाधिकाऱ्यांनी जिल्हाधिकाऱ्यांची भेट घेऊन त्यांना सोमवारी निवेदन दिले आहे. या परिसरात कातळावर मोठ्या अक्षरात ‘रिफायनरी रद्द असे लिहून घोषणा देत तीव्र विरोध दर्शवण्यात आला आहे. रिफायनरी विरोधी संघटना आक्रमक झाली आहे. कंपनीकडून या परिसरात सुरू असलेले सर्व्हेक्षण काम तात्काळ बंद करण्यात यावे, अशी मागणी निवेदनातून करण्यात आली आहे.
रिफायनरी प्रकल्पास ग्रामस्थांचा तीव्र विरोध आहे. सर्वेक्षण जबरदस्तीने करायचा प्रयत्न झाल्यास कायदा व सुव्यवस्थेची गंभीर स्थिती निर्माण होऊ शकते. याची पूर्ण जबाबदारी जिल्हाधिकारी व पोलिस प्रशासनाची असेल, असा असाही इशारा निवेदनातून देण्यात आला आहे. गेले काही दिवस ग्रामपंचायतीच्या हद्दीत बेकायदेशीरपणे भूसर्वेक्षण, भूगर्भ (कोअरकट) चाचणी, सर्वे क्रमांक खासगी जमिनीवर बेकायदेशररित्या टाकणे, ग्रामपंचायतीच्या अवकाशात ड्रोन फिरवणे असे प्रकार होत असल्याचे निदर्शनास आले आहे. यासाठी ग्रामपंचायतीची परवानगी घ्यावी, अशी असे या निवेदनात म्हटले आहे.
हे सर्वेक्षण प्रस्तावीत रिफायनरी संबंधात असल्याचेही मीडियातून समजले आहे. आमच्या ग्रामपंचायतीचा रिफायनरी विरोधात ग्रामसभेचा ठराव झालेला आहे. ग्रामस्थांचा रिफायनरीला तीव्र विरोध आहे. सर्वेक्षण करण्यासाठीचा कुठलाही प्रस्ताव आमच्या ग्रामपंचायतीत आला नाही. त्यामुळे असे सर्व सर्व्हेक्षणे तात्काळ बंद करण्यात यावेत, अशीही मागणी विरोधकांनी केली आहे. तसेच कुठल्याही प्रकारचे सर्वेक्षण करायचे असेल तर आधी तसा प्रस्ताव निर्देशित ग्रामपंचायतीत देण्यात यावा. ग्रामपंचायत ग्रामसभा किंवा इतर मार्गाने त्यावर योग्य तो निर्णय घेईल. तरी यापुढे सर्व्हेक्षण ग्रामपंचायतीच्या परवानगीशिवाय होणार नाहीत याची काळजी घ्यावी, अशी विनंतीही यात करण्यात आली आहे.
