‘सुपर डान्सर महाराष्ट्र’च्या मंचावर स्वप्नील-मुक्ताची धमाल
महाराष्ट्रातील सुपर डान्सरचा शोध घेणाऱ्या ‘सुपर डान्सर महाराष्ट्र’ या कार्यक्रमाची चर्चा सर्वत्र होत आहे. या कार्यक्रमात सहभागी झालेले स्पर्धक, नृत्यासह त्यांच्यात असलेले छुपे टॅलेंट, प्रोत्साहित आणि कौतुक करणारे परीक्षक यांसारख्या ब-याच गोष्टींमुळे या कार्यक्रमाची लोकप्रियता दिवसेंदिवस वाढत आहे. अंतिम फेरीत कोण पोहोचणार, कोण बाजी मारणार याकडे सर्वांचं लक्ष आहे. या कार्यक्रमाच्या मंचावर ‘मुंबई पुणे मुंबई ३’ची जोडी स्वप्नील जोशी आणि मुक्ता बर्वे यांनी हजेरी लावली. त्यांच्या उपस्थितीत परीक्षक अमृता खानविलकरच्या वाढदिवसाचे सेलिब्रेशन असा दुग्धशर्करा योग जुळून आल्याने या आठवड्यात प्रेक्षकांना स्पेशल एपिसोड पाहायला मिळणार आहे.
सर्व स्पर्धकांनी मिळून अमृता खानविलकरसाठी ‘हॅप्पी बर्थ डे’ गाणं गाऊन तिला शुभेच्छा दिल्या. त्यानंतर केक कापण्यात आलं आणि प्रत्येक स्पर्धकांने लाडक्या अमृता ताईला वाढदिवसाच्या स्पेशल भेटवस्तूदेखील दिल्या. सेटवर अमृताचा वाढदिवस दिमाखदार पद्धतीने साजरा करण्यात आला.