‘शिवभोजन’ योजनेवर राणेची टीका, ठाकरे कुटूंबाचा फोटो शेअर करुन विचारले ‘ही थाळी कितीची’?
मुंबई |महाईन्यूज|
गोरगरिबांना १० रुपयांत थाळी योजनेला राज्य मंत्रिमंडळाच्या बैठकीत मंजुरी देण्यात आली. शिवसेनेच्या या ‘शिवभोजन’ योजनेवर आता विरोधकांनी टीका करण्यास सुरुवात केली आहे.
निलेश राणे यांनी ठाकरे कुटुंबियांचा एक जुना फोटो ट्विट करुन ‘शिवभोजन’ योजनेवर खोचक टोला लगावला आहे. मुख्यमंत्री उद्धव ठाकरे, त्यांच्या पत्नी रश्मी ठाकरे आणि सुपुत्र आदित्य एकत्र जेवण करत असतानाचा हा फोटो आहे. फोटोत ठाकरे कुटुंबीय महाराजा थाळीचा आस्वाद घेत असल्याचं दिसतं. निलेश राणे यांनी ठाकरेंचा हा फोटो ट्विट करत ही थाळी कितीची? असा उपरोधिक सवाल केला आहे.
विधानसभा निवडणुकीवेळी आपल्या वचननाम्यात शिवसेनेने १० रुपयांत सकस जेवण देणार असल्याचं आश्वासन दिलं होतं. त्यानुसार मुख्यमंत्री उद्धव ठाकरे यांनी मंत्रिमंडळ बैठकीत १० रुपयांत शिवभोजन योजनेला ‘हिरवा कंदील’ दिला. सुरुवातीला राज्यात प्रायोगिक तत्त्वार ५० ठिकाणी शिवभोजन सुरु करण्यात येणार असल्याचं उद्धव ठाकरे यांनी जाहीर केलं आहे. भविष्यात हा आकडा आणखी वाढविण्यात येणार असल्याचंही ते म्हणाले आहेत.
