मुंबईतील वांद्रे इमारत दुर्घटनेत 16 जण जखमी
मुंबई – ऐन पावसाळ्यात वांद्रे येथील शेरली राजन रोड इमारत कोसळून इमारतीचे थेट दोन तुकडे झाल्याचे पाहायला मिळाले. यात 16 नागरिक जखमी झाले आहेत. त्यांना उपचारासाठी लीलावती आणि व्ही. एन. देसाई रुग्णालयात दाखल करण्यात आले आहे. तर घटनास्थळी अग्निशमन दलाच्या चार गाड्या दाखल आहेत. मध्यरात्रीपासून आतापर्यंत ढिगारा उपसण्याचे काम युद्धपातळीवर सुरू आहे. सोमवारी रात्री घडलेल्या इमारत कोसळण्याच्या या घटनेनंतर परिसरात भीतीचे वातावरण पसरले आहे.
पावसाळ्यात इमारत कोसळण्याची मुंबईतील ही दुसरी मोठी घटना आहे. ही इमारत धोकादायक असल्याने आधीच रिकामी करण्यात आली होती. त्यामुळे मोठी दुर्घटना टळली. कोसळलेल्या इमारतीच्या मलब्याचा ढिगारा उपसण्यासाठी सध्या 5 जेसीबी, 5 डंपर मागवण्यात आले आहेत. या दुर्घटनेत 16 जण जखमी झाले. त्यापैकी 2 जण ढिगाऱ्याखाली अडकले होते. त्यांना बाहेर काढण्यात अग्निशमन दलाला रात्रीच यश आले.