‘पिंपरी-चिंचवड दर्शन बस’चे 3 ऑगस्टला उद्घाटन – महापाैर राहूल जाधव

• महानगरपालिकेचे महापाैर राहूल जाधव यांची माहिती 

पिंपरी, ( महा ई न्यूज ) –  पिंपरी – चिंचवड शहरात येणाऱ्या पर्यटकांना शहरातील विविध भागांतील पर्यटनस्थळांच्या ठिकाणी जाता यावे, तसेच शहराची संपूर्ण माहिती समजावी, या हेतूने ‘पिंपरी-चिंचवड दर्शन’ ही बस सेवा सुरू करण्याचा निर्णय ‘पुणे महानगर परिवहन महामंडळा’ने (पीएमपी) घेतला आहे. या उपक्रमाचे उद्घाटन 3 आॅगस्ट 2019 रोजी सकाळी 11 वाजता करण्यात येणार असल्याची माहिती महापाैर राहूल जाधव यांनी पत्रकारांना बोलताना दिली.

पुणे शहरात सुरू असलेल्या ‘पुणे दर्शन’च्या धर्तीवर पिंपरी-चिंचवड दर्शन सेवा सुरू करण्याची पिंपरी-चिंचवडच्या नागरिकांची मागणी या निमित्ताने पूर्ण होणार असून, त्यासाठी प्रति व्यक्ती ४५० ते ५०० रुपये शुल्क आकारण्यात येणार आहे. पीएमपीच्या संचालक मंडळाच्या बैठकीत नुकतीच या प्रस्तावाला मान्यता देण्यात आली.

पिंपरी-चिंचवड शहराला ऐतिहासिक वारसा लाभलेला आहे. शहराच्या आजुबाजुच्या परिसरात श्री क्षेत्र आळंदी, देहू ही तीर्थक्षेत्र आहेत. राज्याच्या कानाकोपऱ्यातून वारकरी या दोन्ही तीर्थक्षेत्रांना भेट देण्यासाठी येत असतात. याबरोबरच उद्योगनगरी अशी ओळख असलेल्या पिंपरी-चिंचवड परिसराचा गेल्या काही वर्षात मोठ्या प्रमाणात विस्तार झाला आहे. शहरात पर्यटनासाठी येणाऱ्या नागरिकांना शहराचा इतिहास समजावा, यासाठी पीएमपीने ही बससेवा सुरू करण्याचा निर्णय घेतला आहे.

या सेवेसाठी सुरुवातीला पीएमपी प्रशासनाने दोन वातानुकूलित (एसी) बस उपलब्ध करून दिल्या आहेत. त्याची आसन क्षमता ३२ इतकी असेल. पहिल्या टप्प्यात उपनगरातील दोन मार्गांवरून या बस धावणार आहेत. सकाळी नऊला निगडीच्या भक्ती-शक्ती समूह शिल्प चौक आणि भोसरी चौकातून या बस सुटणार आहेत. यामध्ये तीर्थक्षेत्र देहू व आळंदीचादेखील समावेश करण्यात आला आहे.

शहरात काही वर्षांपूर्वी पिंपरी-चिंचवड महापालिका ट्रान्सपोर्ट (पीसीएमटी) असताना शहरातून पिंपरी-चिंचवड दर्शनसाठी मिनी बस होती. त्यासाठी ७० रुपये तिकीट आकारले जात होते. पीसीएमटीचे पीएमपीएलमध्ये विलिनीकरण झाल्याने ही सेवा बंद झाली. शहराच्या पर्यटनासाठी स्वतंत्र बस सुरू करण्याची मागणी गेल्या काही वर्षांपासून सातत्याने केली जात होती. त्यानुसार पीएमपीएलच्या संचालक मंडळाच्या बैठकीत हा प्रस्ताव ठेवण्यात आला होता.

‘पुणे दर्शन’ बसचे सध्याचे तिकीट ५०० रुपये आहे. त्याचप्रमाणे ‘पिंपरी-चिंचवड दर्शन’ सेवेचे तिकीट राहणार आहे. एक बस सकाळी नऊला निगडीच्या भक्ती-शक्ती समुह शिल्प चौकातून सुटणार आहे. तेथून रावेत येथील इस्कॉन मंदिर, चिंचवडगावातील मोरया गोसावी मंदिर, मंगलमूर्ती वाडा, चापेकर वाडा, चापेकर बंधू स्मारक, सायन्स पार्क, संभाजीनगरची बर्ड व्हॅली, निगडीची दुर्गादेवी टेकडी, अप्पूघर असे फिरून तीर्थक्षेत्र देहूगाव मार्गे निगडीत परतणार आहे. हे अंतर ४३ किलोमीटर आहे.

पिंपरी-चिंचवड दर्शनची दुसरी बस भोसरी चौकातून सुटून आळंदीला जाईल. तेथून दर्शन घेऊन भोसरी येथील लांडेवाडी चौकातील शिवसृष्टी दाखविली जाणार आहे. त्यानंतर बर्ड व्हॅली, सायन्स पार्क, मोरया गोसावी मंदिर, चापेकर वाडा, मंगलमूर्ती वाडा, दुर्गादेवी टेकडी व भक्ती-शक्ती समुहशिल्प दाखविले जाणार आहे. याचा समारोप सायंकाळी सहाला भोसरीत होणार आहे. हे अंतर ५१ किलोमीटर आहे. लवकरच ही सेवा सुरू होईल, असे पीएमपीच्या अधिकाऱ्यांनी सांगितले.

शहराचा इतिहास समजण्याबरोबरच नागरिकांना शहरातील पर्यटनस्थळांची माहिती व्हावी, या उद्देशाने ‘पिंपरी-चिंचवड दर्शन’ ही बससेवा सुरू केली जाणार आहे. 3 आॅगस्ट 2019 सकाळी 11 वाजता या सेवेचे उद्घाटन अर्थमंत्री सुधीर मुनगंटीवार, पालकमंत्री चंद्रकांत पाटील, केंद्रीयमंत्री रामदास आठवडे, राज्यमंत्री बाळा भेगडे, राज्यमंत्री सुरेश खाडे, भाजपचे शहराध्यक्ष आमदार लक्ष्मण जगताप, भोसरीचे आमदार महेश लांडगे यांच्या उपस्थितीत करण्यात येणार आहे. 

–  राहूल जाधव, महापाैर, पिंपरी-चिंचवड महापालिका