दाट लोकवस्तीतून जाणा-या रिंगरोडचे पुनःसर्वेक्षण करु – मुख्यमंत्री फडणवीस यांचे शिष्टमंडळाला आश्वासन
घर बचाव संघर्ष समितीच्या शिष्टमंडळाने घेतली मुख्यमंत्र्याची भेट
पिंपरी ( महा ई न्यूज ) – पिंपरी चिंचवड नवनगर विकास प्राधिकरणाकडून शहरात रिंगरोडचे काम प्रस्तावित आहे. त्या रिंगरोडमधील बाधित नागरिकांचा नक्की विचार करुन दाट लोकवस्तीतून जाणा-या मार्गावर रिंगरोड मार्गाचे पुनःसर्वेक्षण करण्यात येईल, असे आश्वासन मुख्यमंत्री देवेंद्र फडणवीस यांनी घर बचाव संघर्ष समितीच्या शिष्टमंडळाला आज (सोमवारी) दिले.
चिंचवड येथील क्रांतिवीर चाफेकर स्मारकाच्या भूमीपूजनासाठी मुख्यमंत्री देवेंद्र फडणवीस हे आज (सोमवारी) पिंपरी चिंचवड शहराच्या दाै-यावर आले होते. मुख्यमंत्री शहरात आल्यानंतर घर बचाव संघर्ष समिती शिष्टमंडळाने पिंपरीतील एका खाजगी हाॅटेलमध्ये भेट घेतली. यावेळी घर बचाव संघर्ष समितीचे मुख्य समन्वयक विजय पाटील, शिवाजी ईबितदार, रेखा भोळे, उमाकांत सोनवणे, नारायण चिघळीकर, अमरसिंग आदीयाल,राजू गायकवाड, आशा पाटील, गोपाळ बिरारी यांच्याशी मुख्यमंत्र्यांनी चर्चा केली. यावेळी पालकमंत्री गिरीश बापट, आमदार लक्ष्मण जगताप, आयुक्त श्रावण हर्डीकर, अमोल थोरात, अमर मूलचंदानी उपस्थित होते.
