टॉलिवूड सेक्स रॅकेटचा अमेरिकेत पर्दाफाश
शिकागोच्या स्थानिक न्यायालयात या प्रकरणी तक्रार दाखल करण्यात आली होती. किशन मॉडुगुमुदी उर्फ श्रीराज चोनुपट्टी आणि त्याची पत्नी चंद्रकला पुर्णिमा उर्फ वेभा जयम हे दोघे आंतरराष्ट्रीय सेक्स रॅकेट चालवत असल्याची माहिती चौकशीत समोर आली. हे दाम्पत्य मूळचे हैदराबादचे आहे. त्यांना २८ एप्रिलला वॉशिंग्टनमधून अटक केली. या प्रकरणी होमलँड सेक्युरिटी इन्व्हेस्टिगेटिंगच्या अमेरिकी फेडरल एजंट्सनं न्यायालयात तक्रार दाखल केली आहे.‘११ मे २०१७ ते २२ जानेवारी २०१८ या कालावधीत या दाम्पत्यानं अनेक मुलींना देहविक्रय व्यवसायात ढकललं. पीडित मुलींना अमेरिकेत घेऊन जात होते. तेथे त्यांना हॉटेलात किंवा मॉडुगुमुदीच्या घरी ‘कैद’ करायचे. त्यानंतर अमेरिकेतील तेलुगू किंवा अन्य भारतीय भाषिक सोहळ्यांमध्ये त्यांना देहविक्रेयसाठी घेऊन जात होते,’ असे तक्रारीत म्हटले आहे.
१६ फेब्रुवारी २०१८मध्ये पोलिसांनी या दाम्पत्याच्या घरी छापेमारी केली. तेथे एक बॅग सापडली. त्यात ७० कंडोम आणि एक नोंदवही मिळाली. त्यात अनेक अभिनेत्रींची नावं आणि त्यांच्या ‘डेट्स’ची नोंद केली होती. शिकागो न्यायालयाने या दाम्पत्याचा जामीन अर्ज फेटाळून त्यांची रवानगी तुरुंगात केली आहे.