जम्मू- काश्मीरमधील पुलवामा जिल्ह्यातील अवंतीपोरा येथे सुरक्षा दल आणि दहशतवाद्यांमध्ये चकमक झाली असून या चकमकीत सहा दहशतवाद्यांचा खात्मा करण्यात आला आहे. दहशतवाद्यांकडून मोठ्या प्रमाणात शस्त्रसाठा जप्त करण्यात आला आहे.
अवंतीपोरा येथील त्राल परिसरातील आरमपोरा गावात दहशतवादी लपून बसल्याची माहिती सुरक्षा दलांना मिळाली होती. शनिवारी सकाळी सुरक्षा दलांनी परिसरात शोधमोहीम राबवली. यादरम्यान दहशतवादी आणि सुरक्षा दलांमध्ये चकमक झाली. या चकमकीत सहा दहशतवाद्यांना कंठस्नान घालण्यात आले. परिसरात शोधमोहीम राबवल्यानंतर ऑपरेशन संपल्याचे सुरक्षा दलांनी स्पष्ट केले. मृत दहशतवादी झाकीर मुसाच्या दहशतवादी संघटनेशी संबंधित असल्याचे समजते.
भारताच्या सुरक्षा दलांनी या वर्षभरात २३० हून अधिक दहशतवाद्यांचा खात्मा केला आहे. गेल्या आठवड्यात पुलवामा येथील सिरनू या गावातही सुरक्षा दलांनी तीन दहशतवाद्यांचा खात्मा केला होता. मात्र, या चकमकीनंतर स्थानिक तरुण रस्त्यावर उतरले होते आणि या हिंसाचारात सहा तरुणांचा मृत्यू झाला होता.
