आग्रा – एका खासगी रुग्णालयाच्या ऑपरेशन थिएटरमध्ये शिरून भटक्या कुत्र्याने एका नवजात बालकाचे लचके तोडून त्याला ठार केल्याची धक्कादायक घटना समोर आली आहे. फर्रुखाबाद येथील ही घटना घडली.
आवास विकास कॉलनीतील आकाश गंगा हॉस्पिटलमध्ये सोमवारी सकाळी ८.३० वाजण्याच्या सुमारास ही घटना घडली. एका खासगी फर्ममध्ये काम करणाऱ्या रवी कुमार आणि त्यांची पत्नी कांचनवर दु:खाचे डोंगर कोसळले. कांचनला प्रसूतिवेदना सुरू झाल्यामुळे त्यांना या खासगी रुग्णालयात दाखल करण्यात आले. त्यावेळी रुग्णालयातील नर्सिंग स्टाफने नॉर्मल डिलिव्हरी होणार असल्याचे रवी कुमार यांना सांगितले. मात्र, काही वेळेनंतर डॉक्टरांसोबत त्यांनी चर्चा केल्यानंतर सिझेरियन करण्याचे ठरले. त्यानंतर प्रसुतीसाठी रवी कुमार यांच्या पत्नीला रुग्णालयाच्या ऑपरेशन थिएटरमध्ये नेण्यात आले. शस्त्रक्रिया यशस्वी झाल्याचे कळवण्यात आले. मात्र, बाळाला ऑपरेशन थिएटरमध्ये ठेवण्यात आल्याची माहिती रवी कुमार यांना रुग्णालयाच्या कर्मचाऱ्यांनी दिली.
काही वेळेनंतर रुग्णालयातल्या एका कर्मचाऱ्याने ऑपरेशन थिएटरमध्ये कुत्रा असल्याचे सांगत आरडाओरडा केला. त्यानंतर मी ऑपरेशन थिएटरमध्ये धाव घेतली. तेव्हा आमचं बाळं जमिनीवर रक्ताच्या थारोळ्यात पडले असल्याचे दिसले, असे रवी कुमार यांनी सांगितले. या प्रकाराची माहिती डॉक्टरांना आणि रुग्णालयातल्या कर्मचाऱ्यांना दिली. मात्र, त्यांनी आपली चूक मान्य करण्याऐवजी मला पैशांची ऑफर देत झाल्या प्रकाराची वाच्यता न करण्यास सांगितले असल्याचा आरोप रवी कुमार यांनी केला.
