मुंबई : कामाच्या शोधात असलेल्या मानखुर्दमधील एका अल्पवयीन मुलीला घरी नेऊन तिच्यावर बलात्कार केल्याची घटना उघडकीस आली आहे. चार दिवसांपूर्वी नवी मुंबई येथे घडलेल्या घटनेत मुलीच्या कुटुंबीयांनी केलेल्या तक्रारीवरून मानखुर्द पोलिसांनी आरोपीला अटक केली.
संतोष कुमार (वय २८) असे आरोपीचे नाव असून तो खारघर येथील राहणारा आहे. काही दिवसांपूर्वी मानखुर्द परिसरात राहणाऱ्या १६ वर्षीय मुलीची ओळख संतोषशी झाली होती. मुलीला कामाची गरज असल्याने तिने त्याबाबत संतोषकडे विचारणा केली. त्यानुसार त्याने या मुलीला गुरुवारी एका कॅटरिंगच्या कामासाठी नेले. पुन्हा दुसऱ्या दिवशीही तिला कामाच्या निमित्ताने आरोपीने त्याच्या खारघर येथील घरी नेले. या ठिकाणी त्यांनी या मुलीवर बलात्कार करून तिला दुसऱ्या दिवशी मानखुर्द येथे सोडले. मात्र त्यानंतर मुलीच्या अचानक पोटात दुखू लागल्याने तिच्या आईने तिला डॉक्टरकडे नेले असता, तिच्यावर बलात्कार झाल्याचे उघड झाले.
