ठाणे | नवी मुंबईतील भाजपचे आमदार गणेश नाईक यांनी दोन वेगवेगळे गंभीर गुन्हे दाखल झाल्यानंतर ठाणे सत्र न्यायालयात अटकपूर्व जामिनासाठी दोन अर्ज केले असून या अर्जांवर आज, बुधवारी सुनावणी होणार आहे. त्यामुळे नाईक यांना न्यायालयाकडून दिलासा मिळणार की त्यांच्या अडचणीत वाढ होणार याकडे सर्वांचे लक्ष लागले आहे.
नाईक यांच्याविरुद्ध सीबीडी पोलीस ठाण्यात रिव्हॉल्वर दाखवून धमकी दिल्याचा एका महिलेच्या तक्रारीनंतर गुन्हा दाखल झाला होता. त्यानंतर याच महिलेने दिलेल्या तक्रारीनंतर नाईक यांच्याविरोधात नेरुळ पोलीस ठाण्यात बलात्काराचा गुन्हा दाखल झाल्याने एकच खळबळ उडाली. या दोन्ही गुन्ह्यांचा नवी मुंबई पोलिसांकडून तपास करण्यात येत असला तरी नाईक यांनी अटकपूर्व जामिनासाठी ठाणे सत्र न्यायालयात दोन अर्ज केले आहेत. यातील धमकीच्या गुन्ह्यातील अटकपूर्व जामीन अर्जावर २१ एप्रिल रोजी न्यायालयात सुनावणी झाली होती.
न्यायालयाने या प्रकरणात पोलिसांचे म्हणणे मांडण्याविषयी सांगत सुनावणी पुढे ढकलली. त्यावेळी नाईक यांना कोणताही दिलासा मिळाला नाही. तर, बलात्कराच्या गुन्ह्यामध्ये नाईक यांनी केलेल्या अटकपूर्व जामीन अर्जाचे प्रकरण अन्य न्यायालयात वर्ग करण्याची विनंती संबंधित न्यायाधीशांनी मुख्य न्यायाधीशांकडे केली होती. त्यानुसार, धमकीच्या प्रकरणातील अटकपूर्व जामीन अर्जावर ज्या न्यायालयात सुनावणी सुरू आहे, त्या अतिरिक्त सत्र न्यायाधीश राजेश गुप्ता यांच्या न्यायालयात दोन्ही अटकपूर्व जामीन अर्जांवर आज, बुधवारी एकत्रित सुनावणी होणार आहे.
