फोटो काढण्यासाठी गेले ते परतलेच नाही, ‘या’ दोन हसऱ्या चेहऱ्यांसोबत घडला धक्कादायक प्रकार
जुन्नर ( पुणे) : जुन्नर शहरालगतच्या असलेल्या सोमतवाडी येथील पद्मावती तलावाच्या ठिकाणी फोटो काढण्यासाठी गेलेल्या दोन शाळकरी मुलांचा पाय घसरून दोघेही तलावात पडले. तलावात गाळ असल्याने त्या गाळात अडकून दोन अल्पवयीन मुलांचा मृत्यू झाला आहे. रविवारी उशिरा ही घटना घडल्याने परिसरात एकच खळबळ उडाली होती.
मिळालेल्या माहितीनुसार, पवन दुर्गेश ठाकूर( वय १३), सम्राट देवेंद्र परदेशी( वय १४) दोघेही राहणार परदेशपुरा जुन्नर अशी हा घटनेत मयत झालेल्या शाळकरी मुलांची नावे आहेत. रविवारी ( दि.३) रोजी पाचच्या सुमारास हे दोघे जण सोमतवाडी येथील पद्मावती तलाव येथे फिरण्यासाठी गेले होते. यावेळी फोटो काढत असताना तलावाच्या कडेला उभे असताना त्या दोघांचाही पाय घसरला. त्यामुळे दोघेही तलावात पडले. मात्र तलावात गाळ साचला असल्याने दोघांना त्याचा अंदाज आला नाही व दोघेही तलावात बुडून गेले. त्यातच दोघांचा मृत्यू झाला.
याची माहिती स्थानिक नागरिकांना मिळताच त्यांनी मृतदेह बाहेर काढले. त्यानंतर त्यांचे मृतदेह रुग्णलयात नेले असता, डॉक्टरांनी त्यांना मृत घोषित केले. जुन्नर पोलिसांकडून घटनेची नोंद करण्यात आली असून अधिक तपास पोलीस करत आहेत.