तरुणीच्या हत्येप्रकरणी तिसऱ्या आरोपीच्या अटकेनंतर पुन्हा धक्कादायक माहिती उघड
![Shocking information revealed again after the arrest of the third accused in the murder of a young woman](https://mahaenews.com/wp-content/uploads/2022/08/Shocking-information-revealed-again-after-the-arrest-of-the-third-accused-in-the-murder-of-a-young-woman.jpg)
औरंगाबाद : प्रियकराने प्रेयसीची हत्या केल्यानंतर तिचे तुकडे करून वाहनातून नेत असल्याचा प्रकार काही दिवसांपूर्वी समोर आला होता. या हत्या प्रकरणात पोलिसांनी तिसऱ्या आरोपीला अटक केली असून अंकिताचा गळा दाबून हत्या केल्यानंतर तुकडे करण्याअगोदर आरोपी मनवर याने अंकिताच्या अंगावरील दागिने लंपास केल्याची माहिती समोर आली आहे.
अंकिता श्रीवास्तव या तरुणीची तिचा विवाहित प्रियकर सौरभ लाखे याने मित्र मनवर खान याच्या मदतीने १५ ऑगस्ट रोजी हडको भगात खोलीत गळा दाबून हत्या केली होती. तसंच मृतदेहाचे तुकडे गावाला चारचाकी वाहनातून नेत असताना पोलिसांनी आरोपींना पकडले होते.
या प्रकरणात आता तिसरा आरोपी मनवर याला पोलिसांनी अटक केली असून कोठडी दरम्यान मनवर याने धक्कादायक खुलासे केले आहेत. अंकिता जेव्हा अंघोळ करून बाहेर आली तेव्हा तिचा ओढणीने गळा दाबून खून करण्यात आला. नंतर मनवर आणि सौरभ या दोघांनी मृतदेहाचे तुकडे केले. मात्र तुकडे करण्याआधी मनवरला सोन्याचा मोह आवरला नाही. त्याने अंकिताच्या अंगावरील सर्व दागिने काढून घेतले होते. चोरलेले दागिने मनवरने घरात लपविले होते. ते दागिने सिडको पोलीसांनी जप्त केले आहेत.
अंकिता-सौरभच्या ‘त्या’ दोन मित्रांच्या चौकशीची शक्यता
अंकिता आणि सौरभचे प्रेम प्रकरण माहिती असलेल्या दोघांचे दोन कॉमन मित्र आहेत. त्यातील एकाने अंकिताच्या फोटोमुळे सौरभकडे संशय व्यक्त केला होता. याच संशयाने सौरभच्या मनात घर केले होते. त्यावरून अंकिताचे इतर कुणासोबत अफेअर असल्याचे त्याला वाटायला लागले होते. आता हे दोन मित्र कोण, याचा शोध पोलीस घेत असून त्यांची चौकशी पोलीस करू शकतात.