मुंबई: व्हॉट्सअ‍ॅप अकाउंट हॅक करून ६०० हून अधिक महिलांना अश्लील मेसेज आणि व्हिडिओ पाठवल्या प्रकरणी अंधेरी पोलिसांनी एकाला अटक केली आहे. अंधेरी पोलिसांनी बुधवीर उशिरा एका कॉलेजमधून या तरुणाला अटक केली. रवी दांडू (वय ३०) असं या तरुणाचं नाव आहे. त्याच्यावर ६०० हून अधिक महिलांना अश्लील मेसेज आणि व्हिडिओ पाठवल्याचा आरोप आहे. महिलांशी गप्पा मारणे, त्यांना भेटण्याचे आमिष दाखवणे हा पुरुषाचा हेतू होता, असे पोलिसांनी सांगितले. आरोपी रवी दांडू हा एका खासगी बँकेत डाटा एन्ट्री ऑपरेटर म्हणून काम करतो.
फेब्रुवारीमध्ये एका महाविद्यालयीन १७ वर्षीय मुलीने पोलिसांत रवीविरोधात तक्रार केली होती. एका अज्ञात व्यक्तीने या अल्पवयीन मुलीचे व्हॉट्सअ‍ॅप अकाउंट हॅक करून तिच्या कॉन्टॅक्ट लिस्टमधील मुलींना अश्लील मेसेज आणि व्हिडिओ पाठवल्याप्रकरणी तिने पोलिसांत तक्रार केली होती.
रवीने या अल्पवयीन मुलीला फोन करुन तिला कॉलेजच्या व्हॉट्सअ‍ॅप ग्रुपमध्ये अ‍ॅड करायचं आहे असं सांगितलं. तो तिच्या कॉलेजमधील प्राध्यापक असल्याचं त्याने सांगितलं. तसेच, तिला दिशाभूल करत ओटीपीही मिळवला. जो त्याने तिचं व्हॉट्सअ‍ॅप हॅक करण्यासाठी वापरला. त्यानंतर त्याने तिच्या कॉन्टॅक्ट लिस्टमधील सर्व मुलींना अश्लील मेसेज व्हिडिओ पाठवले.
त्याने जानेवारी ते जुलैपर्यंत ६१० महिलांना अश्लीस मेसेज आणि व्हिडिओ पाठवले आहेत. बनावट कागदपत्रांवर मिळवलेले सहा ते सात फोन आणि 11 सिमकार्ड पोलिसांनी जप्त केले आहेत. पोलिसांनी आरोपीवर आयपीसीच्या कलम ३५४ डी आणि ५०९ आणि पॉक्सो कायद्याच्या कलम १२ अंतर्गत लैंगिक छळ आणि पाठलाग केल्याप्रकरणी गुन्हा दाखल केला आहे.
