भिंतील भगदाड पाडून अडीच किलो दागिने चोरीला
पुणे | प्रतिनिधी
वारज्यातील गणपती माथा येथे सराफाचे दुकान फोडून चोरट्यांनी एक कोटी २३ लाख रुपये किंमतीचे अडीच किलो सोन्याचे दागिने चोरून नेल्याचा प्रकार शुक्रवारी सायंकाळी उघडकीस आला. चोरट्यांनी शेजारचा गाळा भाड्याने घेऊन सराफी दुकान बंद झाल्यानंतर भिंतीला भगदाड पाडून ही चोरी केल्याचे समोर आले आहे.
याबाबत आनंदकुमार वर्मा (वय ३४, रा. कर्वेनगर) यांनी तक्रार दिली आहे. त्यानुसार अज्ञात चोरट्याच्या विरोधात वारजे पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, वर्मा यांचे गणपती माथा येथे माउली ज्वेलर्स नावाचे सराफी दुकान आहे. या ठिकाणी ते सोन्याच्या दागिन्यांची विक्री करतात. त्यांच्या दुकानात एक कामगार आहे. ते नेहमी सकाळी नऊ वाजता दुकान उघडतात; तर दुपारी दोन वाजता बंद करून पुन्हा सायंकाळी पाच वाजता उघडतात. त्यानंतर रात्री दहा वाजता पुन्हा बंद करतात. त्यांच्या दुकानाशेजारी पूर्वी बेकरी होती. पंधरा दिवसांपूर्वीच ही बेकरी बंद केली होती. त्यामुळे गाळा मालकाने आठ दिवसांपूर्वी एका व्यक्तीला मसाल्याचे दुकान सुरू करण्यासाठी हा गाळा भाड्याने दिला होता. आठ दिवसांपासून त्या ठिकाणी फर्निचरचे काम सुरू होते.
वर्मा यांच्या नोकराची तब्येत बरी नसल्यामुळे तो शुक्रवारी सकाळी घरी गेला होता. त्यानंतर ते दुपारी अडीचच्या सुमारास दुकान बंद करून घरी गेले. त्या वेळी शेजारचा गाळा बंद होता; पण त्याचे शटर अर्धवट उघडे होते. वर्मा सायंकाळी पावणे पाचच्या सुमारास दुकान उघडण्यासाठी परत आले. त्या वेळी त्यांना शेजारच्या गाळ्याला भगदाड पाडून त्यांच्या दुकानातील सोन्याचे दागिने चोरून नेल्याचे दिसून आले. दागिन्यांचे बॉक्स अस्ताव्यस्त पडले होते. सर्व दागिन्यांचे मोजमाप केल्यानंतर दोन किलो ४६५ ग्रॅम वजनाचे एक कोटी २३ लाख रुपये किंमतीचे दागिने चोरीला गेल्याचे आढळून आले. या घटनेची माहिती मिळताच वारजे पोलिसांनी तत्काळ घटनास्थळी धाव घेतली. या प्रकरणी आरोपींचा माग काढण्यात येत आहे. पोलिस उपनिरीक्षक एन. ए. मुंढे तपास करीत आहेत.
आरोपी सीसीटीव्हीत कैद
आनंदकुमार वर्मा यांनी दुकानात सीसीटीव्ही लावले होते. त्यामुळे सामाईक भिंतीला भगदाड पडताना आणि नंतर दागिने चोरताना चोरटे सीसीटीव्हीत कैद झाले आहेत. चोरट्यांनी टोपी घातली असून, चेहऱ्याला मास्क लावलेला दिसत आहे. सीसीटीव्हीच्या माध्यमातून चोरट्यांचा माग कढण्यात येत आहे.