सगळे अडवत असतानाही तरुण बाईकवर शिरला पुराच्या पाण्यात, पुढे काय घडलं…
हिंगोली : हिंगोली जिल्ह्यातील सिरसम ते खेरडा गावाजवळ असलेल्या ओढ्याला आलेल्या पुरात उतरणे एका तरुणाला चांगलेच महागात पडले आहे. खरंतर, सध्या राज्यात मुसळधार पाऊस सुरू असल्यामुळे नदी-नाल्यांना पूर आल्याचं चित्र आहे. अशात एका तरुणाच्या नको त्या धाडसाचा एक धक्कादायक व्हिडिओ सध्या व्हायरल होत आहे.
पुराचे पाणी ओलांडून पार करणं हे तरुणाला चांगलेच महागात पडले आहे. गावकऱ्यांनी या तरुणाला रस्ता ओलांडू नको असे सांगितले असता त्याने एकाचेही न ऐकता पुराच्या पाण्यात गाडी टाकली. पण पाण्याच्या प्रवाहांनी त्याला नदीत पात्रात खेचून नेले. त्याचे दैव बलवत्तर तर म्हणून ग्रामस्थांच्या मदतीने त्याला नदीपात्रातून बाहेर काढण्यात आले. मात्र, त्याची दुचाकी वाहून गेली आहे.
वसंता भोसले असं या तरुणाचं नाव आहे. कालपासून सुरू असलेल्या मुसळधार पावसाने रस्ते, शेत, शिवार जलमय झाले असून नदी-नाले ओसंडून वाहू लागले आहेत. अशा परिस्थितीत नागरिकांनी पुराच्या पाण्यातून न जाण्याचे आवाहन प्रशासनाने आहे. तरीसुद्धा नागरिक आपला जीव धोक्यात घालून पुराचे पाणी ओलांडताना दिसत आहे.
काल दुपारपासून सुरू असलेल्या पावसामुळे जिल्ह्यातील अनेक भागातील संपर्क तुटला असून शेतातील पिके देखील पाण्याखाली झाकली गेली आहेत.
