भक्तांना घेता येणार अयोध्येतील राम लल्लाचं दर्शन; तारीख आली समोर

नाशिकः सन् २०२४ च्या फेब्रुवारी महिन्यात रामलल्लांची मूर्ती नूतन गर्भगृहात स्थापन केली जाईल, असा विश्वास श्रीराम जन्मभूमी तीर्थक्षेत्र विकास योजनेचे कोषाध्यक्ष स्वामी गोविंददेव गिरी यांनी व्यक्त केला. या स्थापनेनंतरही मंदिराचे काम सुरूच राहील व भाविकांसाठी दर्शनाची व्यवस्था होईल, असेही त्यांनी सांगितले.पंचवटीतील श्री काळाराम मंदिरात दर्शनप्रसंगी ते बोलत होते. नेत्यांच्या अयोध्या दौऱ्याबाबत ते म्हणाले, अयोध्येचा राम सर्वांचा असला तरीही त्याचा उपयोग राजकीय हेतूसाठी केला जाऊ नये. रामाच्या दर्शनासाठी कुणालाही प्रतिबंध असता कामा नये. याशिवाय ज्ञानवापीमधील तपास आणि ताजमहालासंदर्भात भाष्य करताना त्यांनी या ठिकाणी पूर्वी मंदिर असल्याचे म्हटले.