देवेंद्र रात्री वेश बदलून एकनाथ शिंदे यांना भेटायला जायचे, असा मोठा गौप्यस्फोट अमृता फडणवीस

सत्तासंघर्षादरम्यानचे अनेक किस्से मुख्यमंत्री एकनाथ शिंदे यांनी विधानसभेतील भाषणात सांगितले. आमच्यातील वाटाघाटीसाठी आणि चर्चांसाठी सगळे आमदार झोपल्यावर मी देवेंद्र फडणवीस यांना भेटायला जायचो, चर्चा करायचे आणि आमदार झोपेतून उठायच्या आतमध्ये मी हॉटेलवर यायचो, असं मुख्यमंत्री एकनाथ शिंदे यांनी आपल्या पहिल्याच भाषणात सांगितलं. या सगळ्या पार्श्वभूमीवर अमृता फडणवीस यांच्याशी ‘एबीपी माझा’ने संवाद साधला. यावेळी त्यांनी बोलता बोलता, देवेंद्र रात्री वेष बदलून एकनाथ शिंदे यांना भेटायला जायचे, असा गौप्यस्फोट केला.

देवेंद्र रात्री वेष बदलून एकनाथ शिंदे यांना भेटायला जायचे
अमृता फडणवीस म्हणाल्या, “देवेंद्र साधारण खूप रात्रीपर्यंत काम करतात. दरम्यानच्या काळात जॅकेट वगैरे घालून ते घराबाहेर पडायचे. डोळ्यावर चष्मा वगैरे घालायचे. मलाही कधीकधी ओळखायला यायचं नाही. त्यावर मी त्यांना विचारलंही, की नवीन काही सुरु आहे का? तर उत्तर न देता ते प्रश्न टाळायचे. पण मला वाटायचं की काही ना काही मोठी राजकीय घडामोड सुरु आहे”.”एकनाथ शिंदे यांचं भाषण आपण सगळ्यांनी ऐकलं. त्यावरुन असं लक्षात येतं की आमदारांमध्ये किती अनरेस्ट होता. त्यामुळे कुठे ना कुठे तो अनरेस्ट निघणारच होता. मग भाजपने त्याला वाट मोकळी करुन देण्याचं काम केलं आणि देवेंद्र त्यांच्यामागे उभे राहिले आहेत, तर ते चांगलंच आहे”, असंही अमृता फडणवीस म्हणाल्या.

एकनाथ शिंदे यांनी विधानसभेत बोलताना काय म्हटलं होतं?
देवेंद्र फडणवीस आणि मी कधी भेटायचो हे आमच्या आमदारांनाही माहिती नव्हतं. सगळे आमदार झोपल्यावर मी फडणवीसांना भेटायला जायचो आणि आमदार उठायच्या आधी पुन्हा हॉटेलवर परतायचो, असं मुख्यमंत्री एकनाथ शिंदेंनी विधानसभेत बोलताना म्हटलं. मुख्यमंत्री शिंदे यांची ही स्टोरी ऐकून देवेंद्र फडणवीसांनी डोक्याला हात लावला.