‘ओएलएक्स’वर घरातील वस्तू विकण्याची जाहिरात करून दोघांनी मिळून एका तरुणाची ८० हजार रुपयांची फसवणूक
पिंपरी: ‘ओएलएक्स’वर घरातील वस्तू विकण्याची जाहिरात करून दोघांनी मिळून एका तरुणाची ८० हजार रुपयांची फसवणूक केली. ही घटना सात आणि आठ ऑगस्ट रोजी गायकवाडनगर, दिघी येथे घडली. बिपिन केशव प्रसाद सिंह (वय २८, रा. गायकवाड नगर दिघी) यांनी या प्रकरणी गुरुवारी दिघी पोलिस ठाण्यात फिर्यादी दिली आहे. त्यानुसार अमित कुमार, शिला देवी (पूर्ण नाव व पत्ता उपलब्ध नाही) यांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, आरोपी अमित कुमार याने त्याच्या घरातील फ्रीज आणि वॉशिंग मशिन विक्रीसाठी ‘ओएलएक्स’वर जाहिरात दिली. ती जाहिरात पाहून फिर्यादी यांनी आरोपीला संपर्क केला. अमित कुमार याने फिर्यादीकडून शीला देवी हिच्या ‘पेटीएम’ खात्यावर ८० हजार ६० रुपये घेतले. पैसे घेऊन फिर्यादीला वॉशिंग मशिन आणि फ्रीज न देता फसवणूक केली. दिघी पोलिस तपास करीत आहेत.
कारच्या धडकेत दुचाकीस्वाराचा मृत्यू
म. टा. प्रतिनिधी, पिंपरी: भरधाव कारने दुचाकीला जोरात धडक दिली. गंभीर जखमी झालेल्या दुचाकीस्वाराचा उपचारादरम्यान मृत्यू झाला. ही घटना शुक्रवारी (१२ ऑगस्ट) सकाळी निगडी येथील पवळे उड्डाणपुलावर घडली.
विजय गुलाब सरोदे (वय ४२, रा. खळवडी, शिरगाव) असे मृत्यू झालेल्या दुचाकीस्वाराचे नाव आहे. या प्रकरणी रामचंद्र शंकर कांबळे (वय ४५, रा. देहूरोड) यांनी निगडी पोलिस ठाण्यात फिर्याद दिली आहे. त्यानुसार कारचालकाच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी आणि त्यांच्या मेहुणीचा मुलगा विजय सरोदे हे दुचाकीवरून १२ जून रोजी सकाळी शिरगाव येथून शिवाजीनगरला जात होते. विजय यांची दुचाकी रस्त्याच्या डाव्या बाजूने असताना आरोपी कारचालकाने भरधाव कार चालवून पवळे उड्डाणपुलावर आल्यानंतर विजय यांच्या दुचाकीला जोरात धडक दिली. यामध्ये विजय गंभीर जखमी झाले. त्यांना उपचारासाठी रुग्णालयात दाखल केले. मात्र, १६ जून रोजी विजय यांचा उपचारादरम्यान मृत्यू झाला. या अपघातात फिर्यादीदेखील जखमी झाले. निगडी पोलिस तपास करीत आहेत.
