तरुणाचा गळा आवळून डोक्यात दगड घालून निर्घृण खून
![Brutal murder by strangling a young man with a stone](https://mahaenews.com/wp-content/uploads/2022/06/Brutal-murder-by-strangling-a-young-man-with-a-stone.png)
हिंगोली: हिंगोलीतील कळमनुरी तालुक्यात एका तरुणाचा गळा आवळून डोक्यात दगड घालून खून करण्यात आल्याची घटना मंगळवारी (१४ जून) घडली आहे. कळमनुरी येथील निकेश कांबळे (वय २२) असे मृत तरुणाचे नाव आहे. याप्रकरणी पोलिसांनी काही संशयितांची चौकशी सुरू केली आहे.
नेमकी घटना काय?
पोलिसांनी दिलेल्या माहितीनुसार, कळमनुरी शहराजवळ हिंगोली मार्गावर एका पेट्रोल पंपाजवळ मुख्य रस्त्याच्या बाजूला एका तरुणाचा मृतदेह आढळून आल्याची माहिती मिळाली होती. त्यावरून कळमनुरी पोलीस ठाण्याचे निरीक्षक सुनील निकाळजे जमादार लक्ष्मण कऱ्हाळे, प्रशांत शिंदे, गजानन होळकर, जगताप यांच्या पथकाने पहाटे दोन वाजता घटनास्थळी धाव घेतली.
पोलिसांनी मृतदेहाची पाहणी केली असता मृतदेहाचा गळा आवळल्याचे दिसून आले. तसेच डोक्यात दगड घालून खून केल्याचे स्पष्ट झाले. पोलिसांनी अधिक माहिती घेतली असता सदर मृतदेह साईनगर भागातील निकेश कांबळे याचा असल्याचे स्पष्ट झाले. पोलिसांनी सदर मृतदेह उत्तरीय तपासणीसाठी कळमनुरीच्या उपजिल्हा रुग्णालयात दाखल केला आहे.
अद्याप गुन्हा दाखल नाही
दरम्यान, पोलीस अधीक्षक राकेश कलासागर, सहाय्यक पोलीस अधीक्षक यतीश देशमुख यांच्या मार्गदर्शनाखाली आरोपींच्या शोधासाठी स्वतंत्र पथक स्थापन करण्यात आले आहे. या पथकातील पोलिसांनी आता काही संशयितांची चौकशी सुरू केली आहे. तसेच, पेट्रोल पंप आणि इतर दुकानांच्या सीसीटीव्ही फुटेजवरुन आरोपींची ओळख पटवण्याचे प्रयत्न पोलिसांनी सुरू केले आहेत. तसेच, मृत व्यक्तीच्या मोबाईलवरुन खुनाचे धागेदोरे शोधण्याचा प्रयत्न पोलिसांनी सुरू केला आहे. या प्रकरणात अद्यापही खुनाचा गुन्हा दाखल झालेला नाही.