भाजपा खासदार रक्षा खडसेंनी घेतली सुप्रिया सुळेंची भेट; राजकीय वर्तुळात खळबळ
जळगावः राष्ट्रवादी काँग्रेस पक्षाच्या नेत्या खासदार सुप्रिया सुळे मंगळवारी जळगाव जिल्हा दौऱ्यावर आल्या होत्या. रात्री त्यांनी माजी मंत्री एकनाथ खडसे यांच्या निवास्थानी भेट दिली. यावेळी भाजप खासदार रक्षा खडसे यांनीही सदिच्छा भेट घेतली. ही भेट औपचारिक असल्याचे सांगितले जात असले तरी याबाबतचा फोटो खा. सुळे यांनी ट्वीट केल्याने अनेकांच्या भुवया उंचावल्या आहेत.
खासदार सुप्रिया सुळे मंगळवारी जळगावात होत्या. त्यांच्या उपस्थितीत जिल्हाधिकारी कार्यालयासमोर राष्ट्रवादीचे महागाईविरोधात आंदोलन झाले. यावेळी माजी मंत्री एकनाथ खडसे, जिल्हा बँकेच्या माजी अध्यक्ष रोहिणी खडसे, जिल्हा दूध संघांच्या अध्यक्षा मंदाकिनी खडसे उपस्थित होत्या. यानंतर रात्री खा. सुळे यांनी राष्ट्रवादी काँग्रेसचे नेते माजी मंत्री एकनाथ खडसे यांच्या निवासस्थानी भेट दिली. याचवेळी एकनाथ खडसे यांच्या स्नुषा तथा भाजपा खासदार रक्षा खडसे यांनी देखील त्यांची भेट घेतली. यावेळी खा. खडसे यांनी सुप्रिया सुळे यांचे पुष्पगुच्छ देवून स्वागत केले. यावेळी त्यांच्यात चर्चा झाली. सुप्रिया सुळे यांनी खडसे याच्या निवासस्थानी दिलेल्या भेटीची ट्विट करून माहिती दिली व भेटीचे फोटोही शेअर केले. या फोटोमध्ये रक्षा खडसेसह मंदाकिनी खडसेही आहेत.
खा. सुळे व भाजप खासदार खडसे यांच्या या भेटीमुळे राजकीय वर्तुळात चर्चा रंगल्या आहेत. दरम्यान ही सदिच्छा भेट असल्याचे दोघींनीही स्पष्ट केलं आहे. आपल्या मतदारसंघात आल्याने त्यांचा सत्कार केल्याची माहिती रक्षा खडसे यांनी दिली असून, याकडे राजकीय दृष्टीकोनातून बघू नये असेही त्यांनी स्पष्ट केले आहे.