आयफोन घेऊन देण्यासाठी प्रेयसीने केला हट्ट; नंतर प्रियकराने जे केलं ते वाचून हैराण व्हाल
![Beloved to take the iPhone; Then you will be annoyed to read what your lover did](https://mahaenews.com/wp-content/uploads/2022/07/Beloved-to-take-the-iPhone-Then-you-will-be-annoyed-to-read-what-your-lover-did.jpg)
नागपूरः प्रेयसी ब्लॅकमेल करीत असल्याने प्रियकराने अल्पवयीन साथीदाराच्या मदतीने तिची हत्या केली. काटोलमधील चारगाव मार्गावरील तरुणीच्या हत्याकांडाचा पर्दाफाश करीत गुन्हेशाखा व काटोल पोलिसांनी प्रियकराला अटक करून त्याच्या अल्पवयीन साथीदाराला ताब्यात घेतले.
पुनीत सुनील सोनी (वय २८, रा. गणेश कॉलनी, आमला) असे अटकेतील प्रियकराचे नाव आहे. तो सराफा असून, त्याचे क्रिष्णा ज्वेलर्स आहे. येथे १९वर्षीय तरुणी काम करायची. दोघांमध्ये प्रेमसंबंध, नंतर शारीरिक संबंध निर्माण झाले. नंतर तरुणी त्याला ब्लॅकमेल करायला लागली. त्याच्याकडून पैसे घ्यायची. काही दिवसांपूर्वी तिने पुनीतकडे महागड्या आयफोन मोबाइलची मागणी केली. मोबाइल घेऊन न दिल्यास पोलिसांत तक्रार करण्याची धमकी दिली. सततच्या ब्लॅकमेलिंगला कंटाळून पुनीतने अल्पवयीन साथीदाराच्या मदतीने प्रेयसीच्या हत्येचा कट आखला.
४ जुलैला तो तिला काटोलमधील चारगाव मार्गावर कारने घेऊन आला. कारमध्येच गळा आवळून तिचा खून केला. मृतदेह रस्त्यावर फेकून पुनीत व त्याचा साथीदार पसार झाले. याप्रकरणी काटोल पोलिसांनी खुनाचा गुन्हा दाखल केला. पोलिस अधीक्षक विजयकुमार मगर, अतिरिक्त अधीक्षक राहुल माकणीकर यांच्या मार्गदर्शनाखाली काटोल पोलिस स्टेशनचे वरिष्ठ पोलिस निरीक्षक आचरेकर, स्थानिक गुन्हेशाखेचे निरीक्षक ओमप्रकाश कोकाटे, साहाय्यक निरीक्षक राजीव कर्मलवार, जितेंद्र वैरागडे, उपनिरीक्षक राऊत व त्यांच्या सहकाऱ्यांनी मारेकऱ्याचा शोध सुरू केला. आधी पोलिसांनी तरुणीची ओळख पटविली. त्यानंतर पुनीतला अटक केली. ब्लॅकमेलिंगला कंटाळून हत्या केल्याचे त्याने मान्य केले.