प्रतिनिधी, नाशिक
घरपट्टी व पाणीपट्टीची अपेक्षित वसुली न होता, थकबाकीचा डोंगर वाढल्याचे लक्षात आल्यानंतर नवनियुक्त आयुक्त रमेश पवार यांनी चार दिवसात ६० कोटींचे थकबाकी वसुलीचे उद्दिष्ट कर विभागाला दिले आहे. त्यामुळे आयुक्तांचे डोंगराएवढे उद्दिष्ट पाहिल्यानंतर विविध कर विभागाचे अधिकारी कामाला लागले असून विभागाच्या अधिकाऱ्यांनी बैठक संपताच, बड्या थकबाकीदारासंह शासकीय कार्यालयांच्या दारात पोहचले आहेत.
महापालिकेचे नवनियुक्त आयुक्त पवार यांनी सोमवारी खातेप्रमुखांची बैठक घेऊन त्यात घरपट्टी आणि पाणीपट्टीच्या थकबाकीचा आढावा घेतला. उद्दिष्ट आणि वसुलीचे आकडे समजून घेतल्यानंतर त्यांनी विभागवार माहिती घेतली. ३१ मार्च संपण्यास अवघे चार दिवस शिल्लक राहिले आहेत. घरपट्टी व पाणीपट्टीची मिळून थकबाकीसह उद्दिष्ट तीनशे कोटीपेक्षा अधिक असतांना घरपट्टी १३७ कोटी तर पाणीपट्टी ६० कोटींची वसुली झाली आहे. त्यामुळे येत्या चार दिवसात प्रत्येक विभागाला दहा कोटी याप्रमाणे ६० कोटींची वसुली करण्याचे निर्देश दिले. मार्च अखेरपर्यंत अधिकाधिक वसुली करण्याच्या सूचना दिल्या. त्यानुसार विविध कर विभागाच्या उपायुक्त अर्चना तांबे यांनी विभागीय अधिकायांना सूचना दिल्या. त्यानुसार विभागीय आयुक्त कार्यालयापासून सरकारी कार्यालयांमध्ये घरपट्टी भरण्याची विनंती करण्यासाठी अधिकारी रस्त्यावर उतरले आहेत.
महापालिकेने ५० हजारांपेक्षा अधिक घरपट्टी थकीत असणाऱ्या करदात्यांच्या मालमत्ता जप्त करून लिलाव करण्याचे तसेच २५ हजारांपेक्षा अधिक पाणीपट्टी थकीत असणाऱ्या करदात्यांचे नळजोडणी तोडण्याच्या सूचना दिल्या. सामान्य करदात्यांविरोधात कारवाई करताना वर्षानुवर्षे घरपट्टी, पाणीपट्टीची थकबाकी असणाऱ्या शहरातील केंद्र व राज्य सरकारच्या अखत्यारीतील कार्यालयांना मात्र सध्या नोटिसा बजावून थकीत कर भरण्याची महापालिकेने विनंती केली आहे. त्यामुळे तांबे यांच्यासह महापालिकेचे विविध कर विभागाच्या अधिकाऱ्यांनी बैठकीनंतरर शासकीय कार्यालयांकडे धाव घेतली.
…तर चारच तास झोपा
पंचवटी विभागीय कार्यालयाने दिलेल्या उद्दिष्टानुसार काम केले नसल्याचे आयुक्त पवार यांच्या लक्षात आले. त्यांनी विभागीय अधिकाऱ्याची कानउघाडणी केली. तुम्ही आठ तास झोपत असाल तर, यापुढे चारच तास झोपा. वसुलीचे उद्दिष्ट पूर्ण करा; अन्यथा थेट पेन्शनच बंद करू, असा सज्जड दम त्यांनी दिला.
…असे आहेत बडे थकबाकीदार
शिक्षण उपसंचालक, टपाल कार्यालय, जिल्हाधिकारी, जिल्हा शासकीय रुग्णालय, जिल्हा शल्य चिकित्सक, कार्यकारी अभियंता महावितरण, सार्वजनिक बांधकाम विभागाचे कार्यकारी अभियंता, दारूबंदी शुल्क विभागाचे अधीक्षक, दारूबंदी शुल्क कर्मचारी निवासस्थान, कार्यकारी अभियंता, पालखेड, जलसंपदा, कार्यकारी अभियंता नांदुरमध्यमेश्वर प्रकल्प, पोलिस आयुक्त स्नेहबंधनपार्क, पोलिस अधीक्षक कार्यालय, कार्यकारी अभियंता सार्वजनिक बांधकाम, किशोर सुधारालय, जिल्हाधिकारी निवास, मुख्य अभियंता जलसंपदा अशा कार्यालयांकडे महापालिकेची लाखोंची थकबाकी आहे.
